FRETILIN komprometidu hodi lori naroman ba Povu Maubere bainhira fila ba ukun iha 2023

Díli, yokalaumedia.com (19/05/2023) – Partidu Frente Revolusionario Timor-Leste da Independente  (FRETILIN) kompromete hodi aposta programa ba pontus lima ne’ebe estratejiku mak hanesan kualifika dezenvolvimentu ba ema hotu, diversifika ekonomia, dezenvolve ba sidade no hela fatin Dignu, dezenvolve Infrastrutura Bázika no Konektividade ikus liu mak garante Boa Governasaun.

Promesa polítika ne’e hato’o husi membru CCF, Cristina Costa, bainhira partisipa iha debate ne’ebe realiza husi CNE no transmite husi RTTL, iha salaun OKA kuarta-Feira ne’e (17/05/2023).

 “FRETELIN sei defende investimentu iha área Edukasaun, Saúde, Inkluzaun Sosial, igualdade Géneru,no Diversifika Ekonomia espesialmente kriasaun Empregu no redusaun ki’ak, no presija garante fundu petroliferu no setor turizmu, Agrikultura, Peskas, Minerais no presisa mos investe iha área indústria”, kompromete Cristina Costa.

Iha fatin hanesan Membru Comité Central FRETILIN (CCF) afirma liu tan katak FRETILIN mos aposta ba desentralizasaun administrasaun no poder lokal hodi hakbesik dezenvolvimentu ba povu iha baze.

“durante ne’e dezenvolvimentu la’o maka’as liu iha iha kapital tanba ne’e FRETILIN hakarak aposta ba desentralizasaun Administrativa no Poder lokal atu nune’e bele hakbesik liu tan dezenvolvimentu ba povu iha área rural sira no ita mos komprometidu atu hametin instituisaun Estadu sira hodi fo atendimentu públiku ida ne’ebe diak ba timor-oan sira hotu”, afirma Cristina Costa iha salaun OKA 17/05/2023.

Reprezentante FRETILIN ne’e husu ba povu atu fo votu konfiansa ba FRETILIN atu bele konkretiza planu prioridade hirak ne’e.

Reportagem : Eva Ximenes

 2,710 Tatal Lee,  1 Views Today