DÍLI, yokalaumedia.com (25/07/2023) Sekretáriu Estadu Formasaun Profisionál no Empregu (SEFOPE) liu husi Diresaun Nasionál Empregu Exteriór (DNEE) realiza programa Pre-Departure Briefing (PDB) ba kandidatu traballadór na’in atus-ida-sanulu (110) ne’ebé mak sei aranka ba servisu iha Austrália hó durasaun kontratu tinan ida to’o haat.

Diretór Diresaun Nasionál Empregu Exterior, Filomeno Soares, hateten Programa PDB realiza antes ne’e traballadór sira bele koñese informasaun no realidade sira husi nasaun origen molok ba servisu iha ema nia rain, nune’e traballadór bele kompriende disiplina servisu, kultura servisu, no regulamentu balun ne’ebé nasaun Austrália iha.

Nu’udar reprezentante SEFOPE, Diretor ne’e mos husu ba kandidatu traballadór sira atu aproveita oportunidade ne’e, hodi aprende Austrália nia sistema servisu.

“Husu atu durante loron rua nia laran atu bele aproveita didi’ak oportunidade ida-ne’e hodi aprende, tanbá regulamentu, kultura, no disiplina servisu iha Austrália, la hanesan ho nasaun Timor-Leste”, husu Diretor Nasionál Empregu Exterior iha cerimonia asina kontratu ho traballador iha Díli.

Filomeno mos kontinua alerta ba traballador timor-oan sira atu hatudu komportamentu ne’ebe di’ak.

“Ha’u husu ba traballadór sira karik ba servisu iha Australia, atu labele ses aan husi sistema, tenke hatudu komportamentu servisu ne’ebé di’ak, hodi loke dalan ba empregadór sira iha Australia emprega tán joven Timor-oan sira ne’ebé hein hela iha sistema data baze SEFOPE nian,” hakotu nia.

Reportagem : Paulo Collo Kontributór & Eva Ximenes (Revizora)

 1,512 Tatal Lee,  1 Views Today