Dili, yokalaumedia.com (1/08/2023)- Governu Timor-Leste liu husi Sekretariu Estadu Formasaun 1 Profisional no Empregu (SEFOPE) realiza asina deklarasaun ho familia no trabalhador Timor-Oan nain 50 ba servisu iha Korea do Sul, ne’ebe mak sei aranka iha loron 06 fulan Agostu tinan 2023 ne’e.

Sekretariu Estadu Formasaun Profisional no Empregu, Rogério Araújo Mendonça, hateten asina deklarasaun ne’e hanesan meius ida hodi kesi metin trabalhador sira hodi la’o tuir regra ne’ebe mak entre rai rua ne’e deside.

Rogério haktuir Givernu deside haruka Trabalhador Timor-Oan ba servisu iha Koreia do Sul atu hadia ekonomia uma-Laran, hadia ekonomia nasaun  ka hasa’e kresementu rai laran nian no trabalhador sira mos fo ona kontribuisaun atu dezenvolve rai ida ne’e.

“Ohin ita bo’ot sira uja xapeo, kamizola bandeira Republika Demokratiku Timor-Leste nian, hodi reprezenta Timor-Leste ba servisu iha Ema nia rain tamba de’it ekonomia uma laran nian”, tenik SEFOPE.

Membru IX Governu ne’e mos kontinua husu ba trabalhador na’in 50 atu servisu ho di’ak, hasa’e netik orasaun ba ita bo’ot sira nia-an.

“Ita bo’ot sira tenki kuidadu-an didi’ak no tenki hases-an husi Alku tamba dezastre ne’ebe mak mosu iha Korea mak bainhira konsumu Alko ho kondisaun Lanu depois tula malu ho motor”, afirma Jacinto.

Entretantu, Ernesto hanesan traballadór deklara nia sentimentu kontente tanba bele hetan oportunidade ba daruak nian hodi ba servisu iha Korreia do Sul.

“ha’u sente kontente tanba bele hetan oportunidade ba daruak nian. Ha’u ba uluk konsege selu alin sira nia estudu, hadia netik uma ba família no agora ha’u liu teste no sei ba iha Domingo 06/08/2023 ne’e hodi servisu fali iha Korreia”, konta Ernesto.

Traballador timor-oan hirak ne’e sei aranka ba nasaun amigu Korreia iha domingo semana ne’e.

Reportagem : Eva Ximenes

 1,190 Tatal Lee,  1 Views Today