Díli, yokalaumedia.com (05/08/2023) – Primeiru-Ministru Kay Rala Xanana Gusmão reuni ho Prezidente Repúblika Ramos Horta, iha kinta-feira ne’e hodi informa konaba governu nia servisu sira durante ne’e no servisu sira ne’ebe sei hala’o tuir mai.

PM Xanana informa, hafin hasoru malu, governu  hala’o ona aprezentasaun Orsamentu Ratifikativu 2023 ba Komité Revizaun Orsamentu (KRO) iha Ministériu Finansa hodi prepara aprezenta ba Parlamentu Nasionál iha semana ne’e.

“Ha’u informa ba Prezidente Repúblika katak, durante semana ida ami haree Orsamentu Retifikativu, maibé ha’u seidauk bele fó sai nia montante tanba ami sei haree fali molok enkamiña ba Parlamentu iha semana oin”, informa Xefe Governu, iha Palásiu Prezidensiál, 03/08/2023 ne’e.

Xanana mos haktuir liu tan katak dezde semana kotuk, liña ministériu sira inklui instituisaun estadu sira aprezenta ona sira nia orsamentu ba Komité Revizaun Orsamentu hodi hadia mós sistema ezekusaun programa no orsamentu ho di’ak no prepara mos proposta Orsamentu Ratifikativu, Governu liu hosi Komité Revizaun Orsamentu prepara mós Orsamentu Jerál Estadu tinan 2024 nian.

“Ami  sukat didiak kbiit atu tau osan ne’e, tanba dala ruma ita husu osan barak maibé ita la ezekuta, nune’e molok iha fim anu 2023 nian ita iha ona orsamentu tinan 2024 nian”, dehan PM

Entretantu, tuir publikasaun husi media-GPM katak reuniaun Komite Revizaun Orsamentu realiza husi Diresaun Jerál Planeamentu no Orsamentu (DJPO), Ministériu Finansas no Sekretariadu Grande Projetu, Ajénsia Dezenvolvimentu Nasionál (ADN), Komisaun Nasionál Aprovizionamentu (CNA), nu’udar Sekretariadu ba KRO Retifikativu 2023 finaliza ona servisu diskusaun Orsamentu Ratifikativu sei aprezenta fali ba Konsellu Ministru, molok lori ba Parlamentu Nasionál.

Reportagem : Eva Ximenes

 1,255 Tatal Lee,  1 Views Today