Díli, yokalaumedia.com (14/08/2023) – Iha segunda-feira ne’e Xefe Governu timor-oan simu vizita husi Embaixadór Filipina ba Timor-Leste, Belinda Antes, hodi diskute futuru kooperasaun ho Timor-Leste.

Filipina sei apoia makas hasa’e rekursu umanu funsionáriu públiku sira no ajuda setór agrikultura.

“sei implementa Projetu iha área oin-oin hanesan dezenvolvimentu rekursu umanu tuir planu no programa governu nian no posibilidade lori investidór Filipinu sira mai Timor-Leste hodi bele ajuda barak liu tan timor-oan sira”, informa Belinda ba jornalista iha iha Palásiu Governu,Dili.

Filipina hahú  apoiaTimor-Leste nia luta ba ukun rasik aan,  demokrasia no estadu de direitu iha kedas tinan 1994 no hola parte iha Forsa Manutesaun Paz (United Nations Peacekeeping Missions iha Timor-Leste -UNMIT) iha 1999 no 2012, hodi fó apoiu umanitáriu ba povu Timor-Leste.

Filipina sei kontinua hamutuk ho nasaun membru ASEAN sira seluk apoia ba Timor-Leste nia adezaun ASEAN iha 2025 atu sai hanesan membru plenu.

Hafoin ne’e, Kayrala Xanana Gusmão mos simu vizita husi Embaixadór Repúblika Indonézia ba Timor-Leste, Okto Dorinus Manik, hodi deskute kona-ba implementasaun zona ekonomia livre iha fronteira ne’ebé sei iha prosesu preparasaun entre ekipa tekniku husi nasaun rua.

“Ohin mai hasoru Primeiru -Ministru Xanana hodi aproveita kumprimenta, no ami deskute kona-ba preparasaun servisu hamutuk entre Timor-Leste no Indonésia hodi kontinua deskute kooperasaun  bilaterál ho governu foun ne’e”,  nia Malik.

Antes ne’e, Prezidente RDTL, José Ramos-Horta, hasoru ona Prezidente Repúblika, Joko Widodo, hodi asina ona akordu kooperasaun zona ekonomia livre entre fronteira Timor no Indonézia iha fulan Jullu 2022 liu ba.

Reportagem : Eva Ximenes

 369 Tatal Lee,  1 Views Today