Díli, yokalaumedia.com (15/08/2023) – Vice-Primeiro Ministro, Ministro Coordenadór dos Assuntos Sociais e Ministro Desenvolvimento Rural e Habitação Comunitária, Mariano Assanami Sabino, simu vizita husi ekipa Asian Development Bank (ADB), iha Palasiu Governu, tersa-feira ne’e hodi diskute konaba kombate má-nutrisaun no dezenvolve bee-moos ba komunidade sira iha área urbana no rural iha futuru.

Country Director ADB, Stefania Dina, hatudu kompromisu ADB nian atu apoia inisiativa governu nian ne’ebe hakarak reduz má-nutrisaun no dezenvolve instalasaun bee-moos iha área urbana ho rural.

“ADB apoiu tebes inisiativa ida ne’ebe promove dezenvolvimentu integradu hodi bele reduz má-nutrisaun dezenvolve bee-moos iha área urbana ho rural iha ne’ebe mós ADB hahu ona halo servisu apoiu projetu bee-moos neebé lao hela iha Dili, Same, Vikeke no Lospalos”, informa Stefani Dina.

Alende nee, aprejenta mós planu neebé atu implementa iha futuru liu-liu kestaun bee-moos nian iha, Ainaru, Suai, no Maliana, maibé sei diskute ho Ministeriu Finansas no hakarak identifika programa prioridade sira hamutuk ho governu atu halo planu investimentu iha futuru.

Enkuantu, Vise-Primeiru Ministru, agradese ba ADB nia boa vontade hodi apoiu Timor nia dezenvolvimentu iha futuru.

“Ohin ami halo diskusaun assuntu rua importante koalia kona-ba má-nutrisaun no bee-moos”, dehan Vise-Primeiru Ministru.

Tuir informasaun publikadu iha Komunikadu Imprensa husi 𝐌𝐞𝐝𝐢𝐚 𝐕-𝐏𝐌-𝐌𝐂𝐀𝐒-𝐌𝐃𝐑𝐇𝐂 katak Kestaun bee-moos sai preokupasaun boot neebé seidauk rezolve, maske aloka ona osan boot, iha Dili parte Postu Administrativu Dom Aleixo, governu aloka ona tokon $127 no tokon $50 aloka ba Lopalos Same no Vikeke, maibe nee sei iha kapital munisipiu deit, tanba ne’e IX governu hakarak kanalizasaun bee-moos tenki fornese ba uma kain sira ho standarte potável ka bele hemu direta husi torneira.

Iha governasaun nee dezenvolvimentu tenke integradu no aprosimasaun neebé regular, governu tomak tenke solidu hodi fornese servisu neebé diak ba povu, maibé laos governu deit povu tomak, partidu polítku, sosiedade sivil, igreza, veteranus   hotu-hotu tenke servisu hamutuk kombate kiak, no kombate má-nutrisaun iha Timor.

Reportagem : Eva Ximenes & Joanito Rangel

 1,246 Tatal Lee,  1 Views Today