Díli, yokalaumedia.com (02/09/2023)- Iha fulan outubru tinan ne’e, Timor-Leste hasoru tan festa bo’ot ida, festa Demokrasia hodi buka fini husi timor-oan sira atu lidera suku sira iha territóriu nasionál tuir dalan ne’ebe RDTL adopta. Istorikamente, suku barak mak sei adopta liurai (semi monarkia), maibe balun mos adopta ona sistema modernu ne’ebe buka ema matenek no kapasitadu mak atu sai sira nia xofer ba periodu ida atu nune’e bele lori susesu ba suku ne’ebe nia pertense ba. Joven, inteletual feto-mane, lia na’in sira hahu buka forsa hodi kandidata an ba knar demokrátiku ne’e tanba sira konfia an hodi lori susesu ba sira nia knua eh suku.

Doadvend da Cruz Ximenes, foin-sa’e no mos finalista husi Universidade Da Paz (UNPAZ), oan husi Jaime Ximenes no Olinda Fatima Correa, husi Aldeia Uai-ae, suku Uai-Oli, postu administrativu Venilale Munisipiu Baucau hakarak hola parte iha maratona demokratiku ne’e hodi dezenvolve suku durante nia mandatu.

 “Desizaun ida atu kandidatu ba sefe Suku ne’e la’os ha’u pesoal nia desizaun maibe desizaun koletivu husi estudante, juventude sira liu-liu inan-aman ka komunidade sira ne’ebé organiza malu, iha hakarak atu buka lider foun ida hodi dirije Suku iha period tu’ir mai, hakarak hirak ne’e mosu tanba dudu husi kondisaun sira ne’ebé komunidade ho kamada oioin infrenta durante ne’e, iha ne’ebé nu’udar nain lolos ba ukun la sente saida mak ukun, durante ne’e exklui povu husi ukun no iha indisius oioin ba abuzu de poder. Tanba ne’e mak kandidatu ha’u nian nu’udar orden husi povu ne’ebé hakarak iha mudansa ba lider la’os ambisaun pesoal”, hateten Doadvend .

Uaioli oan ne’e mos akresenta liu-tan katak la iha povu, laiha líder, povu mak hili, povu mak ukun. Hakaer ba palavra de orden ida ne’e mak ita tenki hatu’ur povu nu’udár na’in lolos ba ukun, envolve povu diretamente iha prosesu foti desizaun, buka alternativas, implementa, monitoriza no halo avaliasaun ba nia problema, solusaun no rezultadu sira.

Joven Uai-Oli oan ne’e konklui katak ita iha hakarak maibé ita tenki esforsu atu ita nia hakarak sira ne’e sai realidade, nune’e ita tenki mos haka’as-an konsolida ita nia forsa atu it abele hetan vitoria iha eleisaun fulan oin ne’e.

“Ita iha hakarak maibé ita tenki esforsu atu ita nia hakarak bele sai realidade, ita tenki haka’as-an konsolida ita nia forsa atu ita bele hetan vitoria tenke mantein solidu, partisipa ativu iha kualker asuntu ne’ebé ligadu ho ita nia destinu iha futuru”, afirma Uaioli oan ne’e.

Relembra fali katak Iha loron 13 fulan-outubru tinan 2023, Konsellu Suku sira sei hasoru malu hodi estabelese meza eleitorál Suku no hodi simu kandidatura Xefe Suku sira. Iha loron 28 fulan-outubru tinan 2023, Asembleia Aldeia sira sei hasoru malu hodi realiza eleisaun Delegada Aldeia ba Konsellu Suku, Delegadu Aldeia ba Konsellu Suku no Xefe Aldeia no Xefe Suku.  Karik laiha kandidatu Xefe Suku sira ida hetan liu metade hosi votus válidu ne’ebé hasai, Asembleia Aldeia sira hasoru malu, hodi realiza votasaun daruak iha loron 13 fulan-novembru tinan 2023.

Konsellu Suku sira hasoru malu iha loron 8 fulan-novembru tinan 2023, hodi hili Lian-na’in no reprezentante Juventude ho asentu iha Konsellu Suku nian. Iha Suku sira ne’ebé hala’o votasaun daruak hodi hili sira-nia Xefe Suku, Konsellu Suku nian sei hasoru malu iha loron 23 fulan-novembru tinan 2023 hodi hili Lian-na’in no reprezentante Juventude ho asentu iha Konsellu Suku.

Reportagem : Cedelizio Rêgo.

 14,710 Tatal Lee,  1 Views Today