Díli, yokalaumedia.com (11/09/2023)  – Primeiru-Ministru, Kay Rala Xanana Gusmão  hala’o enkontru ho Prezidente Parlamentu Nasionál, Maria Fernanda Lay, Vice Prezidente Parlamentu Nasionál, Maria Terezinha Viegas no Sekretaria Meza Parlamentu Nasionál, Bendita Moniz Magno hodi atualiza programa governu diskute jornada Orsamentu Jerál Estadu (OJE) 2024.

Deskusaun Jornada Orsamentu OJE 2024 ho tema “Kontinua Konsolida no Transforma Prestasaun Servisu liu hosi Hadia Sistema Jestaun no Estratéjiku Investimentu” sei hala’o loron tersa-feira 12 Setembru 2023 lidera hosi Primeiru-Ministru Xanana no partisipa hosi membru governu no instituisaun estadu nian hotu.

“Ha’u mai informa ba senhora prezidente no vice prezidente kona-ba preparasaun kalendáriu Orsamentu Jerál Estadu 2024, katak, aban iha salaun Ministériu Finansas sei simu ema hotu- hotu komesa diskute jornada orsamentu”, informa PM Xanana ba jornalista iha Parlamentu Nasionál.

Tuir agenda katak diskusaun sei hala’o hahú oras 08:00 too 17:00, no  hahú Sesaun -I, sei halo abertura jornada orsamentu lidera hosi  Primeiru-Ministru Xanana, Ministra Finansas, Santina Cardoso ho Vise hodi introdus matéria diskusaun.

PM Xanana hatutan, hafoin halo diskusaun ba kalendariu orsamentu ne’e, governu liu hosi Konsellu Ministru sei halo rezumu ba programa no orsamentu tomak molok aprezenta ba Parlamentu Nasionál.

Tuir komunikadu imprensa ne’ebe ekipa yokalaumedia.com asesu katak, Prezidente Parlamentu Nasionál, Maria Fernanda Lay, informa Parlamentu Nasionál kontinua hala’o nafatin ninia funsaun tuir lei, bainhira governu halo tiha deskusaun bele aprezenta ba Parlamentu Nasionál hodi tau iha agenda ba  deskusaun iha plenaria.

Agenda Deskusaun Preparasaun Sesaun -II, Sesaun Makro Fiskal, Petrolíferu, Apoia Exeternu no Setór Finansas hodi halo deskusaun ba situasaun: Situasaun Makro Fiskal, Dezempeñu Investimentu Fundu Petroliu,Informasaun kona-ba Empréstimu, PPP no Apoiu Doadores, Informasaun kona-ba Dezemvolvimentu Setór Finanseiru iha Konstrusaun Estadu, Papél Banku BNCTL iha Dezenvolvimentu Ekonomia Timor-Leste.

Seksaun III, Sesaun Prioridade, Alvu Atu Atinji no Senariu Tetu Fiskal 2024.

Enkuantu Seksaun IV,  Diskusaun kona-ba Prioridade Anuál no Senáriu Tetu Fiskal 2024 no Enseramentu

Reportagem : Eva Ximenes.

 3,447 Tatal Lee,  1 Views Today