Díli, yokalaumedia.com (13/09/2023) – Governador Foun Banco Central Timor-Leste (BCTL), Helder Lopes hateten Timor-Leste agora sei utiliza hela moéda Dolar Amerikanu nu’udar rejime moéda ofisiál, tanba BCTL iha limitasaun ba utilizasaun instrumentus.

 “BCTL nia kompeténsia ne’ebe iha mak sei halo estudu komprensivu hodi analiza sobre vantajem no desvantajem ba utilizasaun moeda, será que ita sei manten nafatin ho moeda dolar ka ita intruduz moéda foun tenki bazeia ba estudu komprensivu depois husi ida ne’eba mak ita halo desizaun propriu”, haktuir Governador BCTL, Helder Lopes, hafoin simu pose, iha BCTL, kuarta-Feira, (13/09/2023).

Governador ne’e mos informa katak iha futuru sei introduz rejime moeda ofisiál bazeia ba prinsipius no objetivu atu benefisia dezenvolvimentu sosiu-ekonómiku liu husi rezultadu estudu.

“bainhira halo intrudusaun ba moeda foun ruma tenki sukat ninia konsekuensia no benefisiu, moeda ne’e tenki fo vantajem ne’ebe bo’ot hodi kontribui ba dezenvolvimentu ita nia rain, ita labele introduz fali moeda ne’ebe ikus mai la fo valor no la kontribui ba dezenvolvimentu ba ita nia rain”, nia subliña.

Alein de ne’e mos Governador mos informa katak BCTL iha ona hanoin atu harí edifisiu foun, maibe sei koordena ho governu.

“relasiona ho Plaka ne’ebe mak Primeiru-Ministru, Kay Rala Xanana Gusmão, asina ne’e mak ita sei prepara oinsa atu harí infraestrutura propriu ba bancu central ita sei koordena ho governu tamba bancu central iha ona rai”, informa Helder.

Ex-Vice-Ministru Finansa ne’e mos relata liu tan katak Banku Sentral Timor-Leste nu’udar instituisaun ba órgaun ida importante, independente iha ita nia rain tenki iha kbi’it, rekursu umanu, infra-estrutura, sistema ne’ebe di’ak nune’e bele fasilita servisu ne’ebe di’ak hodi kontribui ba dezenvolvimentu ekonómia.

Reportagem : Eva Ximenes

 2,208 Tatal Lee,  1 Views Today