Bobonaro, yokalaumedia.com (22/09/2023) – Ministru Komérsiu no Indústria, (MCI), Filipus Nino Pereira, kolleta masin no ikan salamaun iha Suliran, Suku Aidabaleten, Postu Atabae no munisipiu Bobonaro.

Governante ne’e hateten Bainhira produsaun masin lokál bele responde ona konsumu nasionál, Governu bele hapara importasaun masin husi nasaun seluk, tan ne’e husu agrikutór atu kontinua prodúz masin barak liu tan.

“Governu hanoin ona polítika substituisaun produtu importadu, maibé presiza reforsa kuantidade produsaun no kualidade produtu hodi responde ba demanda merkadu nasionál”, dehan Ministru MCI, Nino Pereira, iha Suliran, Kuinta-Feira, (21/09).

Ministériu Komérsiu no Indústria alerta ba promotor produtu nasionál atu promove produtu lokál sira tama iha merkadu nasionál. Produtu hirak ne’ebé identifika ona atu promove ba merkadu nasionál hodi substitui produtu importadu maka bee-minerál, masin, no kafé.

“Produtu tolu ne’e nu’udar produtu primadona ne’ebé presiza promove hodi domina merkadu nasionál. Ita husu ona empreza importadór sira atu hapara importasaun masin, maibé presiza hasae kuantidade produsaun masin iha rai lara. Ita toman ona konsumu aihan ne’ebé importa husi nasaun seluk. Ita ladun konsumu aihan sira hanesan batar, fehuk, aifarina no talas. Tanba ita konsidera produtu lokál hirak ne’e nu’udar aihan komplementáriu de’it, la’ós aihan esensiál ne’ebé konsumu loro-loron, tanba maioria ema loro-loron han mak foos husi nasaun seluk. Bainhira foos folin sae, Ita hahu hakilar malu. Ida ne’e mak akontese ohin loron”, akresenta liu tan.

Timoroan hot-hotu presija serbisu maka’as hodi produs aihan sira ne’ebé loro-loron konsumu, atu labele depende ba importasaun tanba Governu de’it sei labele halo buat ida.

“Ita tenke apoia malu hodi produs barak liutan. Governu de’it la bele. Presiza apoiu husi komunidade, tenke badinas produs aihan sira barak liutan, balun ba faan no balun hodi han. Nune’e Ita bele hamenus importasaun aihan husi nasaun seluk”, ministru husu.

Entretantu, empreza NPM Industry ne’ebé sosa masin husi Sentru Produsaun Masin Suliran, prontu atu sosa ho kuantidade boot.

“ami bele halo prosesamentu to’o tonelada 15 kada loron, maibé demanda ida ne’e la konsege responde husi komunidade produtor masin iha rai laran”, gestor NPM Industry.

Ministériu Komérsiu no Indústria mos koopera ona ho empreza NPM Industry Unipessoal hodi hasa’e produsaun masin iha rai laran, no sei fó atensaun ba manutensaun no ekspansaun ba produsaun masin.

Reportagem : Cedelizio do Rego.

 3,843 Tatal Lee,  1 Views Today