Governu deskute ho IFC’Banku Mundial implementasaun projetu aeroportu Komoro

Díli, yokalaumedia.com (09/02/2024) – Primeiru-Ministru (PM), Kay Rala Xanana Gusmão hala’o enkontru ho Reprezentante International Financial Corporation (IFC- World Bank), Melisa Day hodi deskute kona-ba kooperasaun servisu hodi implementa kontrusaun ba futuru projetu Aeroportu Internasionál Prezidente Nicolau Lobatu, Dili.

Enkontru ne’e akompaña direita hosi Ministru Planeamentu no Investimentu Estratéjiku, Gastão Francisco de Sousa, Ministra Finansas, Santina José Rodrigues F. Viegas Cardoso no Ministru Obras Públiku (MOP) Samuel Marçal hodi rona direita programa no planu ne’ebé Governu no IFC-World Bank koopera.

Ministru Planeamentu no Investimentu Estratéjiku, Gastão informa enkontru ne’e sira deskute kona-ba kontinuasaun apoiu hosi IFC-World Bank atu haree implementasaun projetu boot sira hanesan, aeroportu, portu no estrada sira.

“Enkontru ohin hamutuk ho senhor Primeiru-Ministru Xanana haree liu ba projetu reabilitasaun Aeroportu Dili hodi ita deskute senhora, Melisa Day hosi IFC ami haree oinsa ida dudu projetu sira ne’e ba oin. Ba aeroportu ami sei halo revizaun ba dezeñu, kustu no buat hotu- hotu depois sei halo fila fali aprezentasaun, tanba seidauk finaliza,” informa Ministru Gastão ba jornalista iha Palasiu Governu, Dili.

Projetu Aeroportu Dili sei hala’o liu hosi modalidade Parseiru Públiku Privadu (PPP) ne’ebé governu sei tau osan no nomos setór privadu.

Governu sei kontinua konvida nafatin Governu Japaun ne’ebé apoia halo dezeñu ba Aeroportu hodi haree hamutuk servisu.

Iha enkontru ne’e, Reprezentante International Financial Corporation (IFC- World Bank), Melisa Day entrega mós relatóriu no programa sira ne’ebé IFC no Governu Timor-Leste trasa ona sei hala’o deskusaun klean liután molok hala’o implementasaun.

Reportagem : Eva Ximenes

 598 Tatal Lee,  1 Views Today