AUSTRÁLIA, yokalaumedia.com (07/03/2024) – Primeiru-Ministru (PM), Kay Rala Xanana Gusmão kontinua introdus misaun servisu Organizasaun Naun Govermentál g7+ nian ba estudantes atus no intelektuál sira hosi universidade oin-oin iha Melbourne, Austrália.

Xefe Governu Xanana informa asuntu ne’e bainhira sai orador prinsipál iha programa Global Citizen Now Melbourne ho tema “Confronting Global Challenges In The Asia-Pacific” ne’ebe hala’o iha salaun Centrepiece at Melbourne Park, Oliympic Blvd, Merbourne VIC 300.

Programa Global Citizen Now Melbourne ne’e realiza iha ambitu selebrasaun simeira ASEAN-Austrália ba dala-50 (1974-2024) hodi bolu lider no intelektuál ASEAN, inklui Primeiru-Ministru Xanana sai orador hodi fahe esprensia Timor-Leste nian.

Xefe Governu Xanana dehan, Timor-Leste foin maka ukun aan tinan 20-liu, enfrenta problema oin-oin atu sai membru ASEAN. Mezmu hasoru problema, maibé Timor-Leste sai fundador ba Organizasaun g7+ ne’ebe lidera paízes g7+, ne’ebe halibur nasaun frajil no pos-konflitu hamutuk 20 husi Áfrika, Ázia, Médiu Oriente no Pasífiku atu ajuda malu rezolve sira nia problema krize politika no militár hodi harii dame no harii estadu (peace building and state building).

“Ami hanesan fundador ba Organizasaun g7+ halibur pais estadu frajil no pais pos- konflitu, ami hahú ho nasaun hitu, agora ami iha nasaun rua-nulu no ikus liu mak nasaun Yemen. Agora ita hare de’it iha minutu nia laran, funu iha Gaza no funu iha Ukrania, Israel, no Myanmar nian halo ema barak mate no terus, maibé buat ida sai prinsipiu ba ami mak ita presiza solusiona problema sira ne’e hodi dehan, “Adeus Konflitu, Benvindu Dezenvolvimentu,” dehan PM

Xefe Governu Xanana tatoli tan, “Ita bele ko’alia, ita bele dehan buat hotu-hotu, ita bele halo konferensia barak-barak hanesan iha Nasoens Unidas, maibé ita la ajuda ema lori ba pais estadu demokrariku, ema sei kontinua koondena ita, tanba ha’u ba tiha ona Afrika haree kona-ba pais frajil konflitu no pos konflitu. Ami (g7+) ajuda sira, ajuda la’os hanorin, maibé ajuda fahe ho esperensia, Ha’u la’òs dehan katak orgullu, maibe kontente, kontente tanba bele ajuda malu atu hapara funu iha mundu no harii dame iha mundu,” tenik PM.

PM Xanana husu ba entidade hotu- hotu ne’ebé partisipa iha konfrensia Global Citizen liu-liu estudante sira iha Melbourne atu hamutuk kontinua hato’o mensajen solidaridade atu fanun mundu luta kontra funu no injustisa sosiál ne’ebe kontinua mosu iha nasaun frajil sira.

PM Xanana hatutan, esprensia Timor-Leste iha luta ba ukun rasik aan, uluk hetan apoia mòs hosi Sosiedade Sivil sira ne’ebé luta ba direitu umanus no povu Austrália, espesiál liu iha Melbourne sempre ajuda povu Timòr hodi halo kampaña ba mundu tomak ho maneira oin-oin.

“Global Citizen tenke tau hanoin hamutuk oinsa bele halo mudansa ba mentalidade ema hotu iha mundu, Melbourne hanesan fatin espesiál iha Timoroan nia fuan, durante ami nia luta tinan 24 nia laran, iha momentu ne’eba Melbourne sai sentru ba ativista hodi fó solidaridade, hamoris nafatin tradisaun ativizmu nian ho di’ak, favor kontinua ba, ida ne’e importante tebes, importante tebes atu muda lideres sira nia mentalidade. Ita bele ko’alia kona-ba rai, ita bele ko’alia kona-ba mudansa klimatika, ita bele ko’alia buat hotu-hotu, maibé problema mak bahinira ita hakarak, hanesan ha’u ko’alia ba iha inisiu Melbourne iha Timor-oan nia fuan, tanba durante luta tinan 24 nia laran, laiha governu ida, maibé povu Austrália espesialmente iha Melbourne solidariedade ativista sira nian hodi apoia no defende ami hodi kontinua luta, agora imi prepara hare ba ohin no ba futuru,” nia hatete.

g7+ servisu makaas atu apoia no reprezenta país sira no mós halo atu mundu internasionál rona pais hotu nia lian. g7+ daudaun ne’e iha estatutu hanesan observadór iha Organizasaun Nasoins Unidas, ne’ebé fó- dalan ba nia atu aprezenta perspetiva koletiva ida kona-ba ajenda no servisu Nasoins Unidas nian. g7+ defende papél ida ne’ebé ativu liu iha Nasoins Unidas hodi promove reziliénsia no estabilidade Estadu sira nian.

Hafoin hato’o palestra, estudante atus hotu- hotu hamarik hodi basa liman agradese ba esperensián Ne’ebe Xefe Governu fahe reprezenta Timor-Leste nu’udar pais obserbador ASEAN no pozisaun Timor-Leste sai fundador ba g7+ lidera pais 20 atu promove dame.

* Adapta husi Media-GPM

 295 Tatal Lee,  2 Views Today