Saint Jhon, yokalaumedia.com (24/05/2024) – Primeiru Ministru (PM), Kay Rala Xanana Gusmão ohin arranka Indonésia ba São João Antígua-Barbuda hodi partisipa iha IV konferénsia internasionál kona-bá Estadu illa kiik dezenvolvidu sira, hahu husi loron 27-30 Maiu 2024.

Konferénsia ne’e importante tebes tanba iha konferénsia Organizasaun Nasaun Unidas (ONU) nian tuir-mai nu’udár konferénsia renovadór, hodi loke paradigma foun bá prosperidade iha Estadu illa kiik dezenvolvidu sira perante krize globál.

Líder mundiál sira sei halibur-malu iha Conference on Small Island Developing States (SIDS4), ne’e atu aprezenta planu assaun foun ne’ebé konstrui reziliénsia hosi Estadu illa kiik hamutuk 39 hodi nune’e bele aborda hamutuk no bele alkansa dezafiu sira mundu nian, inklui Objetivu Dezenvolvimentu Sustentável.

Konferénsia ne’e realiza iha momentu krítiku tebes bá Estadu illa kiik dezenvolvidu sira (SIDS) ne’ebé ho populasaun kuaze millaun 65, sita husi komunikadu Imprensa ne’ebe publika husi Media-GPM foin lalais ne’e.

Nasaun membru sira SIDS nian barak mak seidauk rekopera hosi atake doubradu krize finanseira globál no atake pandemia COVID-19, nune’e mós enfrenta impaktu rápida hosi alterasaun klimátika sira.

Konferénsia ne’e mos buka atu deskobre inisiativa espesífika sira, buka solusaun konkreta atu bele responde bá dezafiu importante sira SIDS nian, krize klimátika, estragus bá biodiversidade inklui dívida sira ne’ebé aumenta bá beibeik.

Líder mundiál sira sei akompaña hosi seitór privadu sira, sosiedade sivíl no joven sira atu promove ideia foun, levanta promesa foun sira hodi apoia no kobre kestasun krítika sira bá futuru.

Durante konferénsia ne’e, Sekretáriu-Jerál ONU sei hato’o nia deklarasaun no pontu-de-vista, inklui mos líder sira seluk hanesan Prezidente Konferénsia, Prezidente Assembleia Jerál ONU nian, Prezidente Konsellu Ekonómiku no Sosiál ONU nian, Prezidente Aliansa Estadu illa kiiik sira, Sekretáriu -Jerál Konferénsia nian, Konselleiru Espesiál Konferénsia nian no reprezentante juventude.

Alende reuniaun plenária ualu, sei realiza mós diálogu interativu lima ho
tema sira hanesan: Revitalizasaun Ekonomia SIDS nian bá kresimentu Aseleradu no Sustentável; Mellora forma krítika sira finansiamentu no apoiu efikásia liu hosi parseria kolaborativa sira; estabelese fundu bá mudansa klimátiku ne’ebé iha benefísiu bá SIDS:

Baze hosi rezultadu sira COP28 UNFCCC nian; aproveita dadus no teknolojia dijitál sira, konstrui instituisaun sira ho efikáz bá futuru reziliente ida iha SIDS no investe iha kapitál umanu: responde krize saúde iha nasaun sira SIDS nian no dezenvolve poténsia joven sira iha SIDS.
*source Média GPM

Reportagem : Eva Ximenes

 786 Tatal Lee,  1 Views Today