São João, Antígua no Barbuda, yokalaumedia.com (29/05/2024) – Sua Eselénsia Primeiru-Ministru Antígua no Barbuda, Sr. Gaston Browne no Prezidente 4ª Konferénsia Internasionál Estadu illa kiik dezenvolvidu sira,

Eselentíssimu Xefe Governu sira, Distintu delegadu sira,

Antes atu hahú, ha’u hakarak hato’o ha’u-nia profunda kondolénsia no solidariedade bá vítima sira hosi dezastre naturál rai-halai iha Papua Nova Guiné.

Señor no senhora sira,

Ondra boot ida bá ha’u hodi hola parte iha Antígua no Barbuda iha momentu krusiál ida-ne’e.

Ha’u hakarak agradese bá povu no Governu Antígua no Barbuda kona-bá ninia maravilloza ospitalidade.

Ita-nia prezensa iha-ne’e demonstra ita-nia kompromissu koletivu atu buka solusaun bá dezafiu sira ne’ebé Estadu illa kiik dezenvolvidu sira enfrenta.

Ha’u fiar katak, hamutuk ita la’ós “kiik”. Hamutuk, ho vizaun ida no ambisaun ne’ebé partilla hamutuk, ita “Estadu boot sira Oseániku nian” ne’ebé servisu bá reziliente prosperidade ita-nia povu.

Ita-nia lista dezafiu ne’e barak, maibé liu hosi konferénsia ne’e fó oportunidade bá ita atu ko’alia hamutuk iha li’an ida de’it atu deside hamutuk ajenda dezenvolvimentu bá tinan 10 oin mai.

Nasaun sira SIDS nian barak mak iha semellansa, maibé ita tenke mantein firme iha buat ne’ebé halo ita diferente. Nasaun ida-idak hosi ita, iha ninia istória rasik, kultura no kontestu, no iha kontestu ami-nian rasik iha sentidu katak solusaun ida nunka aplika bá hotu-hotu.

Iha tinan 25 lima liu bá, povu Timor-Leste hili independénsia hafoin periúdu lubuk ida hela iha okupasaun no kolonializmu. Desde ne’e, ita rezolve ona dezafiu sira lorloron nian atu dezenvolve nasaun ne’ebé dame no demokratiku, hosi tizolu sira funu nian. Ami hatene katak, ami la mesak iha ami-nia luta. Ita sai ida de’it hosi nasaun sira SIDS nian ne’ebé hasán hela tarrefa todan bá dezenvolvimentu sustentável. Ami servisu makaas atu dezenvolve ami-nia nasaun iha momentu sira difísil, nakonu ho dezafiu.

Dezigualdade ne’ebé ha-abut an iha nasaun ida-idak mak sai impedimentu bá nasaun barak iha SIDS atu bele hetan prosperidade.

Konflitu global ameasa pás no ita-nia seguransa.

Mudansa klimátika ne’ebé hamosu hosi nasaun industrializadu sira-kria ona situasaun amerjénsia globál ida ne’ebé lori ameasa bá ezisténsia hosi nasaun sira ne’ebé ki’ak no vulnerável.

Lorloron ita rona nasaun dezenvolvidu sira ko’alia kona-bá importánsia hosi “orden globál ne’ebé bazeia bá regra” reguladu hosi Lei Internasionál. Maibé orden globál ida-ne’e duni mak hanaruk dezigualdade no esplorasaun.

Ita asiste nasaun dezenvolvidu sira ignora tiha Lei Internasionál bainhira sira hakarak, no ida-ne’e duni mak dala barak konvén liu ho sira.

Ida-ne’e inklui ho promessa feita sira atu apoia nasaun dezenvolvidu sira, partikularmente kompromissu hosi Konvensaun-Kuadru Nasaun Unidas (ONU) nian kona-bá Alterasaun Klimátika, Akordu Paris no realizasaun dezenvolvimentu sustentável.

Relatóriu espesiál ONU nian kona-bá Objetivu Dezenvolvimentu Sustentável bá tinan 2023 hateten katak, metade hosi ODS la serve bá kumprimentu tarjetu implementasaun, no pursentu 30 paradu. Meta sira ne’e inklui kestaun krítiku sira hanesan pobreza, kombate hamlaha no mudansa klimátika.

Iha dékada tolu liu-bá, ONU konsiente ho dezafiu úniku ne’ebé nasaun sira SIDS enfrenta no ho komitmentu atu apoia sira nia dezenvolvimentu sustentável.

Desde ne’e, ami adopta ona kuadru asaun tolu: Programa Barbadu sira, estratejia Mauritius nian, no mós kuadru asaun Samoa. Iha semana ne’e, ami sei adopta planu foun atu kompleta komitmentu sira anteriór nian.

Timor-Leste apoia instrumentu sira ne’e no konkorda atu adopta planu foun ne’e.

Maski nune’e, komitmentu sira ne’e laiha sentidu bainhira ninia implementasaun la efetivu no alokasaun orsamentu ne’ebé adekuadu tuir nesesidade.

Ha’u apela bá Estadu hotu-hotu atu bele kumpre sira-nia nia kompromissu bá apoia Estadu sira SIDS nian iha realizasaun dezenvolvimentu sustentável.

Permita ha’u atu termina ha’u nia diskursu kona-bá ita-nia poténsia oseanu nian.

Bá Estadu SIDS nian, oseanu nu’udár parte ida inseparável hosi ninia identidade.

Timor-Leste dezenvolve hela polítika no planu asaun bá ekonomia azul, ho asaun konkreta atu bele rezolve poluisaun marina, konserva ambiemte tasi nian no biodiversidade, hodi dezenvolve ekonomia azul sustentável.

Inisiativa sira ne’e presiza tebes servisu hamutuk no apoiu hosi amigu sira no mós parseiru ianternasionál sira. Apoiu ne’e presiza aliña ho prioridade nasionál sira.

Timor-Leste aliña ninia pozisaun ho deklarasaun feita hosi G77 no Xina katak SIDS sira tenke lidera no aselera sira-nia dezenvolvimentu.

Atu konklui, ha’u konvida ita hotu, mai ita avansa no husik illa bonita Atinugua no Barbuda ho sentidu urjénsia ida no espíritu kooperasaun ida atu fó garantia bá kompromissu sira liu hosi asaun no prátika konkreta sira.

Obrigadu barak.

Source *media-GPM

 784 Tatal Lee,  1 Views Today