Dili – YokalauMedia-27/1/23 – Secretario Estado Komunikasaun Sosiál (SECOMS-Sigla português), Mericio Juvinal Akara, iha sexta-feira (27/01) lansa media foun ida ho naran “Média Esperansa” ho Lema Lian ba Lian Laek sira, ne’ebe funsiona ho plataforma Online.

Membru Governu ne’e iha nia diskursu hatudu Oitavu Governu nia prontidaun atu apoia orgaun komunikasaun Sosiál sira.

 “Hau representa governo hakarak fo apresiasaun ba ita bo’ot sira nu’udar foinsa’e, ne’ebé iha iniciativa harí ona media foun ho plataforma online ne’e tanba media iha papela importante iha ita nia sociedade” afirma Akara, iha Xanana Reading Room, lecidere.

Mericio hakle’an liu tan katak mundu ohin loron globalizadu ona tanba nee jovem sira hahu asesu informasaun liu husi online hanesan mos “Média Esperansa” no iha fatin ne’ebe de’it tuir mudansa teknolojia, la hanesan uluk ne’ebe existe de’it mak Televizaun konvensional no radio ho Sistema analog. No husu atu media ne’e oferese informasaun ne’ebe kredível, loos, no evita informasaun la loos (Hoaks)  sira ba públiku. Governante refere kontinua kompromete atu nafatin apoia media online ne’e no husu atu labele monu iha dalan klaran.

“Hau hanoin governo pronto atu kolabora, atu buka dalan hodi fasilita, joven sira nia inisiativa sira ne’e, maibe labele monu iha dalan klaran, ida ne’e mak governo nia hanoin no prespetiva”, kompromete.

Domingos da Silva nu’udar Diretor média Esperansa, hateten órgaun komunikasaun ne’e eziste la’os atu kompete ho media sira seluk ne’ebe hamri’ik nanis ona, maibe mai ho misaun ida atu fahe informasaun ba lian laek sira.

“órgaun komunikasaun ne’e mosu la’os atu kompete, maibe atu lori lian ba lian laek sira, ami mos garante sei fo informasaun ne’ebe kredível no imparsiál ba leitór no haree-na’in sira, no ami mos sei kaer metin prinsipiu ida atu sai nafatin matan, tilun no lian ba lian la iha sira”, hateten Diretor.

Gestor ne’e mos konsiente konaba difikuldade neebe sira nia ekipa sei hasoru bainhira halao vida jornalizmu nian, maibe sei la lakon esperansa hodi luta atu hasoru kualker situasaun ne’ebe mak atu mosu iha future.

Reportagem : Eva Ximenes

 238 Tatal Lee,  1 Views Today