Dili-yokalaumedia.com-21/02/2023– Sefope liu husi Diresaun Nasionál Emprego Exterior (DNEE) ho Pacific Labour Facility (PLF) organiza semináriu hodi fo formasaum ba diretór husi sentro formasaun sira no mos liña ministerial relevante sira atu hasa’e taxa partisipasaun feto iha abilidade laboral nune’e feto mos bele ba servisu iha Australia, ko’alia konaba benefisiu ekonómiku ba Timor-Leste no foka mos asaun reintegrasaun.

Diretor Gerál SEFOPE, Paul Alves, iha Suai Room Timor plaza, esplika katak atividade ne’e organiza hodi kontribui ba redusaun taxa desempregu iha ita nia rain.

“atividade sira ne’ebe fo ba diretor sentru formasaun no liña ministerial relevante sira mak hanesan partisipasaun feto iha abilidade laboral nian, benefisiu ekonomia mai timor-leste depois hetan servisu, no ikus liu mak reintegrasaun. Ida ne’e hanesan polítika ida importante tebes atu bele fasilita taballador sira liu husi knua ne’ebe ita estabelese ona ho UNDP, Ministériu Turizmo, Komérsiu, Indústria no ho Sekretaria Estadu Joventude no Desportu nune’e fasilita formasaun Negósiu ba traballador sira hodi kria rasik negósiu hodi fo sevisu ba timor oan sira seluk no ba reduz taxa dezempregu iha ita nia rain”, esplika Paulo Alves, tersa-feira ne’e.

Tuir dadus husi peskiza ne’ebe halo husi SEFOPE katak hafoin de programa ne’ebe organiza husi PLS ho PALM ne’e, partisipasaun feto hamutuk 29% husi total traballador sira ne’ebe servisu iha Australia.Pekiza ne’e mos relata katak traballador hamutuk na’in 1.500 mak konstrui ona sira nia uma, ne’ebe bele hatudu katak ekonomikamente iha ona mudansa.

Iha tempu badak SEFOPE sei buka tuir no identifika  trabalador sira ne’ebe remata ona servisu iha Austrália no fila ona mai Timor-Leste konaba sira nia kondisaun moris, hela-fatin no atividade atuál, liu husi departamentu merkadu no traballu.

Iha biban hanesan, Filomeno Soares, Diretor Nasionál ba Empregu Exterior, (DNEE) haktuir katak traballador sira ne’ebe, oras ne’e dadauk, kandidata aan atu ba Koreia do Sul hamutuk 1.160, enkuantu ba Australia hamutuk 3.500 konta husi tinan 2022 nian. Alende númeru ne’e existe mos traballador hirak ne’ebe rejistadu iha Sistema SEFOPE nian hamutuk 15.000 husi munisipiu 13 inklui RAEOA.

Reportajem : Nito Rangel & cedelizio do Rego.

 249 Tatal Lee,  1 Views Today