Dili-yokalaumedia.com-(1-3-23)-, Rekorda fali katak, iha Visita Xefe Governu nian ne’ebe hala’o ba Austrália iha fulan kotuk konsege hasoru mos kompanhia empregadora sira ne’ebe iha interese atu emprega jovem timor-oan iha futuru.

Relativamente ho kestaun ne’e, Primeiru-Ministru, Taur Matan Ruak, bolu Ministru Kordenador Asuntu Ekonomia (MKAE), Vice-Ministru Negosiu Estranjeiru no Kooperasaun (MNEK), Sekretáriu Estadu Formasaun Professional (SEFOPE), Diretor Formasaun Profissional sira, hodi atualiza informasaun konaba prosesu kapasitasaun ba joven sira nian hodi hatan demanda merkadu laboral husi Austrália, inklui mos iha Timor-Leste.

Ministru Kordenador Asuntu Ekonomia (MKAE), Joaquim Amaral, hateten existe ona, iha Timor, Sentru formasaun rejistadu hamutuk 93 no sentru formasaun akreditadu husi INDMO hamutuk 27.

 ‘’Sentru formasaun hirak ne’e, kada tinan bele kapasita joven sira besik 8.000, la’os de’it atu ba servisu iha rai liur maibe bele mos servisu iha rai laran. Ita mos koalia konaba sentre Excelente ne’ebe sei estabelese iha Metinaro, ne’ebe oras ne’e iha hela fase preparasaun nia laran, nune’e bele akumula di’ak liu ita nia jovem sira iha futuru”,afirma Joaquim Amaral.

Joaquim Amaral hakle’an liu tan katak existénsia Sentru Excelente ne’ebe responde ba demanda merkadu laboral ne’ebe oras ne’e presija tebes traballador professional, kualifikadu no matenek.

Relasiona ho demanda iha rai laran, Membru Governu ne’e mos salienta tan katak formasaun ne’ebe durante ne’e oferese ba foin-sa’e sira mos atu profisionaliza sira hodi servisu mos iha rai laran, espesialmente iha programa governu nian sira hanesan kontrusaun uma Naroman ba Povu, Konstrusaun Eskola, Estrada. Tan nee presija atu moderniza sentru formasaun existente sira, kapasita di’ak liu tan formador sira.

“ita mos presija atu hadia kualidade sentru formasaun sira hanesan hadia ekipamentu sira, hasa’e liu tan konhesimentu formador sira nian”, akresenta MKAE.

Ho orgulho afirma tan katak Timor leste oras ne’e la’os deit exporta traballador unskills, maibe haruka ona traballador semi Skills, ne’e hanesan metas ida ne’ebe mak oitavu governu konsege atinji durante mandate ne’e.

Xefe Governu, Taur Matan Ruak, apresia ho servisu sira ne’ebe organiza husi liña ministerial ne’e nian relasiona ho estabelesimentu sentru Excelente iha futuru nune’ebe bele absorve timor-oan ho númeru bo’ot no kualifikadu iha merkadu traballu espesialmente husi Austrália.

Reportage: Eva Ximenes

 357 Tatal Lee,  1 Views Today