Timor-oan 34 sei aranka tan ba Koreia do Sul hodi buka moris

Dili, yokalaumedia.com-(24/3/2023), Sekretaria Estadu Formasaun Profissional no Empregu (SEFOPE), Representa husi Diretór Geral Interino, Jacinto Barros Gusmão no Governu Koreia do Sul ne’ebe representa husi HDR (Rekursu Umanu), Mr Yang, realiza serimónia despedida ho kandidatu traballadór timor-oan hamutuk 34 no asinatura deklarasaun ho família, molok aranka ba Koreia do Sul iha Domingo (26-03-23) ne’e.

Husi total ne’e timor-oan na’in 20 sei ba servisu iha área Peska no 14 iha fábrika. Entre tinan 2019-2023 SEFOPE rejista ona traballadór hamutuk na’in 3.285 servisu iha área Peska, na’in 1.959 iha Fábrika no na’in 128 servisu iha área agrikultura, entretantu, total traballadór timor-oan oras ne’e buka moris Koreia do Sul hamutuk 5.372 la konta ho traballadór hirak ne’ebe Estadu Timor-Leste haruka iha tinan sira antes 2019. Dadus ne’e aprezenta husi Diretora Nasionál Empregu Externa Interina, Clementina de Araújo Almeida.

Iha fatin hanesan, Diretor Jeral Interinu, Jacinto Barros Gusmão, hateten juramentu ne’e atu traballadór iha responsabilidade no kumpri regulamentu serbisu sira.

 “juramentu husi ita nia trabailador sira ba inan-aman no mos governu, ho objetivu atu trabailador sira iha responsabilidade mutua ba regras no prosedimentu ne’ebe iha, tamba ita nia trabailador balu serbisu tiha la kumpri fali ema nia regra no sai illegal”, esklarese Jacinto.

Haktuir liu tan katak timor-oan sira ne’ebe oras halai sai husi Sistema no serbisu illegal iha Koreia do Sul bele prejudika timor oan sira, tanba ne’e husu ba família atu konsola sira atu fila mai Timor.

 “numeru illegal ne’e sa’e bebeik loron ruma ema sei taka dalan ba ita, ne’ebe ita hotu husu kolaborasaun ema hotu nian atu redúz numeru illegal ne’e, atu labele prejudika imi nia maluk foin sa’e timor-oan sira seluk”, husu DG interinu.

Iha biban ne’e mos, Mr. Yang, reprezentante HDR Koreia iha Timor-Leste, sente orgullozu ho joven timor-oan balun sira nia pasiénsia no badinas bainhira serbisu ona iha rai ginseng ne’e.

“ha’u nu’udar reprezentante governu Koreia mai iha ne’e, durante ne’e hare’e ita bo’ot sira nia pasiénsia no badinas tebes hodi aprende, ida ne’e halo ami ho Estadu Timor kontinua kria espasu nafatin, atu nune’e ita nia relasaun bilateral sai di’ak nafatin ba oin”, afirma Mr. Yang.

Reportajen: Cedelizio Rego no Fernando Brites

 269 Tatal Lee,  1 Views Today