Viqueque, yokalaumedia.com (24/03/2023) – Credit Union Builale (CUB) fasilita formasaun durante loron rua ba membru nain 10 grupu komunitaria husi Postu Administrativu Vemasse munisipiu Baucau.

Presidente Credit Union Builale (CUB), Jacinta Ximenes, hateten realiza formasaun ne’ebe durante loron rua ne’e atu fahe CU-Builale nia experiénsia konana Jestaun, Literasia finansiál no Literasia dijitál.

“Mai atu aprende oinsa lala’ok koperativa nian, Sistema gestaun administrativa, boa governasaun no benefisiu sira ne’ebe membru sira hetan husi kriasaun kooperativa ne’e”, hateten Gestora CUB, Jacinta Ximenes, liu husi via telefonika, kuinta, 23/03.

Líder Kooperativa ne’e mos apresia ho membru sira husi grupu komunitaria Vemase ne’ebe suporta husi Word Vision Baucau ne’e tanba iha no kapasidade mentalidade diak hodi lidera nia sira grupu ki’ik ne’e no hakarak transforma sai kooperativa ida.

“Membru sira husi grupu ne’e interesado los atu mai aprende ho ami hodi nune’e sira fila fali ba fahe informasaun ne’e ba membru sira seluk hodi dezenvolve liu-liu atu hakbi’it sustentabiliza ekonomia familiar iha baze”, tenik Gestora.

Gestora ne’e Rekomenda katak atu hadia sitema gestaun akontabilístiku no administrasaun finansas, no halo proposta ba  diresaun relevante hanesan Secoop no Word Vision tuir konstutuisan RDTL artigu 138 hodi nune’e bele hetan suporta sira nune’e bele adere ba kooperativa.

Clementina da Costa hanesan membru husi grupu Komunitaria Vemase sente kontente ho formasaun refere tanbe bele motiva sira no fahe experiénsia ba sira nune’e bele muda sira grupu ba Kooperativa hanesan mos ho CUB ka Credit Union Builale.

Iha tinan kotuk, CUB ka CREDIT UNION BUILALE sai segundu klasifikadu nu’udar Kooperativa ne’ebe ho nia jestaun di’ak liu tuir selesaun husi Sekretaria Estadu ba Kooperativa.

Reportagem : Eva Ximenes

 

 

 301 Tatal Lee,  1 Views Today