Dili-yokalaumedia.com (29/03/2023)- Diretór Jerál Formasaun profisionál no Empregu (SEFOPE), Paulo Alves, hateten  iha semináriu ho tema “Promove Kriasaun empregu no redusaun dezempregu iha Timor-Leste” katak Timor-Leste nia polítika estatéjika hodi reduz taxa dezempregu iha rai laran mak formasaun ba merkadu traballu.

“Ita nia estratéjia hodi reduz taxa dezempregu mak polítika formasaun ba merkadu, buka dalan empregu ba timor oan sira, hodi nune’e bele promove kriasaun empregu”, hateten Paulo Alves, iha salaun Novu Turismu, Tersa, (28/03/2023).

Director Jéral hateten atu dezenvolve potensia ne’e presisa servisu hamutuk ho Liña Ministerial sira, Prezidente autoridade munisipiu sira hodi desimina informasaun ba joventude sira liu-liu iha municipiu tamba autoridade munisipiu mak xave importante  no SEFOPE iha hanoin atu ajuda no kapasita liu husi formasaun téknika.

Bazeia ba peskiza ne’ebe mak SEFOPE halo iha tinan 2022 katak iha redusaun ba taxa dezempregu rai laran husi 11% ba 5.1%.  Redusaun refere tuir bele akontese tuir planu atu atinji  iha 2030, maibe governu ida ne’e konsege halo,  akresenta Paulo.

Diretór ne’e klarifika liu tan katak fenómenu ne’e akontese bainhira  halo prosesu rekrutamentu timor-oan hodi ba servisu iha Austrália. Durante semana ida nia laran de’it ema ne’ebe submete dokumentus liu rihun 50.

Entretantu, ho númeru ne’ebe mak bo’ot ne’e, governu presisa introduz polítika ida di’ak ba entidades hotu liu-liu ba prezidente autoridade munisipiu no local sira atu kolabora hamutuk, nune’e dezenvolve no sustentabiliza ita nia nasaun, sublinha Paulo Alves.

Reportagem : Eva Ximenes

 318 Tatal Lee,  1 Views Today