Díli, yokalaumedia.com (20/05/2023) – Presidente Repúblika Demokrátika Timor-Leste, José Manuel Ramos Horta, iha ona informasaun konaba sidadaun Indonézia (warga negara Indonesia, WNI) na’in rua ne’ebe hetan kartaun Eleitoral Timor nian.

“Ha’u rona informasaun la konkretu, ha’u haree husi Video katak sidadaun na’in rua husi Timor Osidentál ho nasionalidade Indonezia, maibe hetan fali kartaun eleitoral Timor-Leste nian maske Indonezia la permite iha  dupla sidadania”, hateten presidente Republika, Ramos Horta, iha Novu Turizmu hafoin partisipa iha semináriu ida ne’ebe organiza husi CNE, Sexta-Feira, 19/05/2023 ne’e.

Presidente Ramos Horta, hateten presija halo investigasaun tamba kazu falsifikasaun dokumentu ne’e ema barak ona mak simu pena.

“Se mak fasilita kartaun eleitoral ne’e krime ida tanba ne’e tenki hetan konsekuensia”, sublinha Horta.

Presidente komisaun Nasional Eleisaun (CNE-Sigla Portugéz), José Agostinho Belo, Iha momentu hanesan, hateten katak relasiona ho kazu sidadaun Indonézia nain rua ne,ebe hetan kartaun Eleitoral Timor nian ne,e, hato’o ona ba prokuradoria Jerál Repúblika.

“Hau hanoin kazu ne’e sériu tan ne’e prokurador presija hola medida rigorozu ida no ami, CNE, hare hela no husu atu investiga ho klean karik envolve órgaun eleitoral tenki hola medida para ba oin labele akontese tan”, klarifika José Belo.

Reportajem : Eva Ximenes

 1,590 Tatal Lee,  1 Views Today