Díli, yokalaumedia.com (23/05/2023) – Hafoin akompanha prosesu kontajem votu ba eleisaun Parlamentar 2023, a nível munisipal no diáspora, liu husi, Quick Count ka Conta Rápida iha sede Partidu nian, estrutura máxima CNRT, realiza konferénsia imprensa ida hodi deklara sira nia susesu iha festa demokrasia ida ne’e no agradese mos timor oan hotu ne’ebe tula fiar ba organizasaun polítika ne’e ho porsentu 40 resin, boot liu kompara ho nia adversáriu politiku FRETILIN, PD, KHUNTO no PLP, inklui partidu 12 sira seluk ne’ebe atinji menus husi Porsentu 4.

Presidente Partidu CNRT, Kayrala Xanana Gusmaão, deklara katak Partidu Congresso Nacional da Reconstrução de Timor-Leste (CNRT) mak sai nu’udar manan-na’in iha eleisaun tinan ne’e.

“Ami hakarak fo hatene deit katak rezultadu ne’ebe ami hetan husi sentru votasaun sira iha suku Postu- Administrativu no munisipiu sira hamutuk 285.785, partidu CNRT deklara-an katak manan iha eleisaun parlamentar 2023”, hateten pr Xanana Gusmão, iha bairro dos grihos, tersa-feira, 23/05 ne’e.

Xanana afirma ho konfiante katak rezultadu ne’ebe hetan la’os falsu maibe hotu-hotu tuir akta ne’ebe asina iha sentru votasaun sira tanba CNRT preparadu antes eleisaun.

“Ami nia sistema ho mekanizmu preparadu kedas husi eleisaun uluk nian no ami nia rezultadu horseik kedas ami hatene, agora hein deit husi STAE publika tiha ami sei konfere se hanesan los ona karik lahanesan ami sei husu malu tamba sa?”, afirma Xanana.

Presidente partidu ne’e mos apresia no louva povu Timor-Leste nia konsensia popular espesial liu joven sira ne’ebe mantem paz no estabilidade nasionál.

Sekretáriu Jerál, Franscisco Kalbuadi Lay, agradese ba timor-oan hotu ne’ebe tula fiar ukun ne’e ba CNRT.

“Hau lori estrutura husi baze to’o nasional partidu nian hakarak hato’o parabens ba povu doben Timor laran tomak ne’ebe fo konfiansa ona ba ami hodi hetan vitoria”, hakotu Kal Buadi Lay.

Tuir dadus ne’ebe STAE (Sekretariadu Téknika Administrasaun Eleitoral) katak timor-oan hamutuk ema na’in 890.145 mak sai hanesan eleitor ba eleisaun ida ne’e, husi númeru refere, sira ne’ebe partisipa iha votasaun hamutuk ema na’in 705.693 no la partisipa iha eleisaun tinan ne’e hamutuk ema na’in 184.452.

Reportajem: Eva Ximenes

 2,261 Tatal Lee,  1 Views Today