Díli, yokalaumedia.com (26-05-2023) – Parlamentu Nasionál iha Kinta-Feira (25/05) ne’e aprova pedidu Presidente Repúblika nian ne’ebe husu atu halo vizita estadu ba nasaun Korreia do Sul no Singapura ne’ebe tuir horáriu sei hala’o iha loron 30 maio to’o 5 juñu tinan ne’e, iha loron hanesan deputadu sira mos aprova Xefe Estadu nia vizita ida tan ba Itália, hodi hasoru malu ho Papa. Vizita ida ne’e sei hala’o iha loron 12 juñu.

Tanba ne’e, iha sexta-feira ne’e, Prezidente Parlamentu reuni ho Prezidente Repúblika hodi trata konaba assuntu refere, no servisu Xefe Estadu nian sei asume interinamente husi Prezidente Parlamentu, Aniceto Guterres

“Ha’u akompaña prezidente hanesan ha’u nia subtitutu kuandu tersa-feira sai ba Korea do Súl, Singapura, fila mai tenki aranka kedas ba Roma”, hateten Prezidente Repúblika, José Ramos Horta, iha Palásiu Prezidensiál, sexta-feira, 26-05.

Iha Sorumutu ne’e Prezidente Parlamentu mos trata ho Xefe Estadu konaba funsionamentu órgaun estadu sira nian, iha momentu tranzisaun, hafoin eleisaun parlamentar tinan ne’e.

Pedidu Xefe Estadu nian ne’e aprova ho votu a favor 46, kontra no abstensaun 0, liu husi plenária estra-ordinária ne’ebe lidera husi Prezidente Parlamentu Nasionál, Aniceto Guterres iha Kinta-feira 25/05 ne’e.

Reportagem : Eva Ximenes

 1,506 Tatal Lee,  1 Views Today