Díli, yokalaumedia.com (30/05/2023) – Partidu Congresso Nasionál Reconstrução Timorense (CNRT) no Partidu Demokrátiku (PD), politikamente, komunika malu ona atu forma IX Governu konstitusionál bazeia ba rezultadu provizóriu eleisaun parlamentar tinan 2023, ne’ebe hatudu CNRT hetan asentu 31, FRETILIN 19, PD 6, KHUNTO 5 no PLP hetan asentu 4 iha parlamentu nasionál.

“se povu fo ona fiar, ita labele husik hela povu nia fiar saugate de’it, ita tenki tane povu nia konfiansa. Ami halo hela komunikasaun polítika liu-liu ho ami nia aliadu partidu PD’’, hateten Francisco Kalbuadi Lay, iha konferensia imprensa ne’ebe realiza iha sede CNRT Bairo dos Grilhos, Tersa-Feira, 30/05.

Kalbuadi Lay haktuir tan katak CNRT no PD sempre iha komunikasaun di’ak, individualmente no organizasionalmente, tanba sira koñese malu di’ak tebes.

“Bainhira hasai ona desizaun, partidu CNRT mos sei hein katak Prezidente Repúblika sei bolu partidu sira ne’ebe hetan asentu, husi ne’eba mak prosesu ne’e ba oin atu halo koligasaun ka saida, ida ne’e depois Prezidente bolu tiha ami ba mak foin deside hodi koalia formasaun Governu”, nia haktuir.

Iha fali lorokraik, ekipa PD ne’ebe xefia husi Sekretáriu Jerál, António da Conceição “Kalohan”, hasoru malu ho Sekretáriu Jerál CNRT, hodi aserta mos planu ba oin, no afirma katak PD mos koñese di’ak CNRT tan ne’e prontu atu servisu hamutuk, tuir lema partidu nian ne’ebe hateten “Maubere oan Prontu servi”.

Kalbuady Lay mos la rekoñese dezmente ho lista balun ne’ebe mosu iha públiku konaba naran membru IX governu nian no hateten katak lista refere HOAX, falsu no bosok tanba estrutura CNRT ladauk tur hamutuk atu deskute konaba lista ruma.

“Estrutura partidu CNRT to’o agora sidauk tur hamutuk no nein iha minutu balun hodi hare kompozisaun Governu nia oin nusa maibe ha’u hatene katak ema balun halo hela lista kompozisaungovernu nian, pior liu tan mak scan tiha ha’u nia asinatura, ida ne’e ha’u dehan falsu/la lo’os”, klarifika Kalbuady Lay.

Tuir Kalbuadi katak atu deside ema ruma ba asume knaar nu’udar membru Governu ruma, ne’e kompete ba desizaun husi Presidente  partidu, Sekretáriu Jerál no estrutura hafoin halo konsulta tuir estatutu partidu nian.

Iha biban ne’e, Sekretáriu Jerál husi partidu vensedor iha Eleisaun Parlamentar 2023 ne’e mos felisita partidu polítiku sira hotu ne’ebe hola parte iha festa popular ne’e.

Reportajem Eva Ximenes

 1,186 Tatal Lee,  2 Views Today