Díli-yokalaumedia.com (01-06-2023) – Komisaun Nasionál Eleisaun (CNE-Sigla Portugéz) ohin remete Akta rezultadu provizóriu Apuramentu Nasionál nian ba Supremo Tribunál Justisa, hafoin durante oras 48, laiha tan rekursu ruma.

‘’CNE fo tempu oras 48 ka loron 2 nia laran maibe laiha partidu polítiku ruma mak hato’o reklamasaun no protestu relasiona ho prosesu apuramentu refere, tanba ne’e, ohin ami remete Akta Rezultadu Provizóriu Apuramentu Nasionál ba Tribunál Rekursu’’, hateten Xefe Gabinete Prezidente CNE, Evangelino Fátima, iha salaun CNE, Kinta-Feira, 01/05/23.

Nia Informa liu tan katak materia sira ne’ebe CNE entrega ba tribunál Rekursu mak hanesan: deliberasaun CNE ne’ebe aprova rezultadu provizóriu nian, Akta Elektróniku, Akta Prosesu Apuramentu Nasionál, Akta koresaun Rezultadu sira kada sentru votasaun ninian, Akta koresaun Rezultadu Apuramentu Munisipál RAEOA no Estranjeiru nian no ikus liu Dokumentu Atribuisaun sekuensi kadeira ba Deputadu Parlamentu Nasionál ninian tau iha kaixa de urna ida.

“karta akompañamentu ba material ho termu intrega sira deliberasaun CNE, Akta Elektroniku rezultadu Provizóriu eleisaun parlamentar tahan ida, Akta Prosesu Apuramentu Nasionál ninian, Akta Koreksaun Rezultadu Sentru Votasaun ne’e versaun elektróniku tamba dokumentus barak hamutuk 1.472 aktas ita labele entrega fizikamente maibe ita entrega versaun elektróniku (USB) tamba dokumentus ohin ita lee sai ne’e iha hotu laran ona, No atribuisaun sekuensia Kadeira ba Deputadu Parlamentu Nasionál, Akta Rezultadu Apuramentu Munisipál sira Rejiaun Espesial Ambino Oecusse no Estranjeiru hamutuk folder 19, akta apuramentu munisipiu iha 14 no Akta Apuramentu Diaspora iha  5’’ no kaixa refere tranka xave liman karuk número 001221146, liman los númeru 0021148 no leten 0021133”, informa Xefe Gabinete.

Iha momentu hanesan Prezidente CNE, José Agostinho Belo, apresia entidade hodtu nia apoiu hodi ita hakat liu prosesu eleisaun hotu ho di’ak.

“hetan akompañamentu husi fiskais partidu hotu nian, kontribuisaun husi Igreja ninian, Sosiedade no ita hatudu duni eleisaun ida di’ak, dignu  nune’e ita bele lori Timor hodi dezenvolve ho di’ak liu tan”, agradese Belo.

Hafoin dadus ne’e entrega, Tribunal sei hala’o nia knar tuir lei eleitoral ho publika ofisialmente iha jornal Repúblika.

Reportajem: Eva Ximenes.

 2,729 Tatal Lee,  2 Views Today