Díli-yokalaumedia.com – 03/06/2023- Líder Organizasaun Sosiedade sivil sira ne’ebe hamahan-an iha Forum Organizasaun Naun-Governamental Timor-Leste (FONGTIL) realiza konferénsia Imprensa, iha CNC Balide, Sexta-Feira 02/06/2023 ne’e, hodi lamenta desizaun parlamentu nasionál nian ne’ebe atu halo leilaun ba kareta prado 65 ne’ebe reprezentante povu hirak ne’e utiliza hela.

Diretór Ezekutivu, Forum Organizasaun Naun-Governamental Timor-Leste (FONGTIL) Valentim da Costa Pinto esplika Deputadu sira halo leilaun ba kareta ne’ebe sira uza, la reprezenta povu iha uma fukun parlamentu nanasionál no konsidera halo traisaun ba povu nia konfiansa tanba kontra lei nú. 15/2008 ne’ebe hateten iha lian ofisiál “Pronunciar-se sobre os actos de administrasaun do património imobiliário do Parlamento Nacional, designadamente a aquisição, doação, alienação, cedência e arrendamento, bem como sobre os direitos a ele ine-rentes”.

“kareta hirak ne’e sosa ho orsamentu estadu dezde 2012-2023 ne’ebe dehan povu nia osan, desizaun Parlamentu Nasionál ida ne’e kontra Artigu 30.2(d) Lei No. 15/2008 kona-ba Lei da Organizasaun no Funcionamentu ba Administrasaun Parlamentár, no  lei ida ne’e la fó dalan ba lelaun ba sasán imobiliáriu Parlamentár nomós la hatuur provizaun ne’ebé detallu kona-ba prosedimentu sira ba lelaun nian hanesan prevee ona iha Dekretu-Lei 32/2011, Jestaun no Alineasaun ba Patrimóniu Móvel sira Estadu nian” esplika Valentim.

FONGTIL mos konsidera desizaun parlamentu nasionál nian nakonu ho konflitu interese, abuzu podér no korupsaun.

“dezde 2012, Parlamentu Nasionál hatuur ona kultura ida ne’ebé korruptu iha mekanizmu servisu Parlamentár nian, ne’ebé halo eis deputadu/a ka deputadu/a atuál sira bele goza sasán públiku nian ba interese pesoál, ne’ebé sei fó prezidente at ida ba futuru polítiku Timor-Leste nian hodi banati tuir“, afirma Diretur FONGTIL.

Sosiadade sivil sira mos  husu ba Parlamentu Nasionál liliu Deputadu sira atu bele dada fali sira nia politika ne’ebé mai ho sensibilidade mukit ba ita-nia nasaun nia situasaun, no tenki entrega fali  Karreta Prado hirak ne’ebe sira uza durante  ba estadu atu jere no mós bolu atensaun ba kamara das kontas atu bele halo auditoria ba Deputadu sira nia desizaun no  husu mos ba Komisaun Anti Korrupsaun (KAK) atu investiga kle’an tanba ami konsidera desizaun ida ne’e nakonu ho konflitu ba interese, korrupsaun, halakon povu nia osan no hatodan finansa públiku no buka benefísiu ba an rasik.

FONGTIL mos husu ba Tribunál Distrital Dili atu anula tia Desizaun Parlamentu Naional nian ne’ebé deside halo Lelaun ba Kareta Parlamentu.

Reportagem : Joanito Rangel

 2,213 Tatal Lee,  1 Views Today