Díli, yokalaumedia.com (21/06/2023) – Kalohan metan lori mataween triste, lori mataween susar nian hafalun família “RUAK” iha inur metiaut, ba sá kalohan metan lori semo tiha inan husi Lola Ruak, Quesadhip Ruak no Tamariza Ruak ne’ebe sai mos nu’udar knosen sorin husi Taur Matan Ruak, antigu Prezidente Repúblika, atuál Primeiru-Ministru iha loron 18 juñu 2023. Iha dalan ba laletek Metiaut ema ua’in, bo’ot eh ki’ik, família eh parente, amigo eh kolega, instituisaun Estadu no Privadu sira nadodon hodi tatoli sira orasaun, hodi hato’o omenagen ba espoza Xefe Governu, Isabel da Costa Ferreira, ne’ebe kánkru intestinal habadak  nia roman ba sosiedade Timor-Leste hodi ba hamutuk fali aman kriadór.

Moris iha rai hanesan lilin ida ne’ebe lakan fo naroman, haree furak los, maibe la sente nabeen neneik to’o mate de’it.

Isabel Ferreira istimadamente ema bolu Belinha, Madam no Dona Isabel durante moris iha rai hanesan lilin ne’ebe lakan hodi fo roman mos ba Timor-oan balun, tulun ba família kbi’it la’ek sira liu husi nia fundasaun “Quesadhip Ruak”, motiva sidadaun tau importánsia ba edukasaun oan sira nian, tulun hari’i instituisaun estadu balun ne’ebe liga liu ba Direitu Umanu, hari’i organizasaun sira atu defende Direitu ema nian. Sira ne’e hotu lakon neneik tuir lilin nia nabeen maske sulin ba permanese iha ema balun nia memória no neon hodi konta hanesan ezemplu no istória husi mana Belinha.

Biografia Badak

Isabel da Costa Ferreira, oan feto husi Mateus Ferreira no Ana Flora de Jesus Ferreira, moris iha Same, Munisipiu Manufahi ho Maun-alin nain sanulu resin tolu (13).

Belinha Hahú eskola primaria iha tinan 1980 no remata liceu (SMA I) iha tinan 1993. Iha tinan 1998 remata lisensiatura iha Direitu husi Universidade Nasional Denpasar, Bali, Indonesia.

Karreira Pre Independénsia

Isabel da Costa Ferreira, hahú ninia karreira profisional barak liu liga ho kestaun sira direitus humanus nian no akuza beibeik hahalok violentu sira nebe komete durante okupasaun militar Indonesia. Tanba ne’e mak iha tinan 1998 no 1999, asumi kna’ar hanesan Koordenadora Jeral ba ONG “Kontras Timor-Timur” no Diretora Direitus Humanus Timór Lorosa’e (CDHTL), iha tinan 1999-2001.

Depoiz de Independénsia

Iha tinan 2001, matebian eleita ba Membru Asembleia Konstituinte, husi partidu UDT, ne’ebe dedika espesiál liu ba hakerek artigu sira Konstituisaun RDTL nian ne’ebe trata konaba Direitu Umanu nian.

Iha faze Administrasaun Tranzitoria Nasoens Unidas nian no hafoin Restaurasaun Independensia, Isabel da Costa Ferreira responsável ba kna’ar oi-oin liu-liu humanitariu, direitus humanus no politikus nian, espesial liu hanesan Vise-prezidente Kruz Vermalha Timor-Leste nian (CVTL), tinan 2002 to’o 2006 Vise-Ministra Justisa, iha tinan 2006 Membru ba Komisaun Verdade no Amizade (CVA) tinan 2005 to’o 2008. Hafoin finaliza kna’ar sira CVA nian, Isabel Ferreira hetan responsabilidade iha área oi-oin Estadu nian, liu-liu, Prezidente Sekretariadu ba Apoiu Komisaun Promosaun PNTL, tinan 2009 to’o 2010, Prezidente Komisaun Akompañamentu ba Prosesu Promosaun sira iha PNTL, tinan 2009 too 2010, Komisaria ba Komisaun Funsaun Publika, tinan 2011 to’o 2014, Asesora Juridika ba Sekretariu Estadu Seguransa, husi 2009 to’o 2015;

Hafoin Taur Matan Ruak eleitu nu’udar Prezidente Repúblika, Isabel Ferreira sai Primeira-Dama husi loron 20 fulan Maiu tinan 2012 to’o loron 20 fulan Maiu tinan 2017 hodi tulun no tau matan ba povu relativamente ho servisu nu’udar espoza Xefe Estadu;

Asesora Juridika ba Ministru Interior iha Fulan Fevereiru tinan 2015 to’o fulan Juñu tinan 2015; Konselheira ba Ministru Edukasaun no Advogada ba Labarik, husi fulan Setembru tinan 2015 to’o ohin loron.

Isabel Ferreira akumula mos esperiensia organizativa no institusional oi-oin, asumi mos kargu sira tuir mai: Koordenadora ba Grupu Serbisu hodi elabora Lei konaba Provedor Direitus Humanus no Justisa, no ba atividade sira konaba ninia estabelesimentu (2001-2005); koordenadora ba Grupu Trabalhu Planu Asaun Nasional Direitus Humanus nian, (2003-2006); Membru ba Grupu Trabalhu elaborasaun Lei Antigu Kombatente sira nian, (2004-2005); Membru ba Grupu Serbisu nebe harii Komisaun ba Ema sira nebe lakon (2005); Membru ba Grupu Permanente Governu no Igreja nian (2005); Membru ba Komisaun Nasional ba Direitu Labarik sira nian, (2005-2006); Membru ba Konselhu Superior Ministeriu Publiku nian, (2006-2011); Koordenadora ba Komisaun Instaladora Jestaun Fronteira nian, (2009-2010); Koordenadora ba Komisaun Negosiasaun Akordu Suplementar PNTL nian (2009-2010); Membru ba Komite Reforma iha Setor Seguransa, (2009-2010).

Simu konvite hodi partisipa hanesan oradora prinsipal iha Seminariu oi-oin no Konferensia Internasional sira, iha Austrália, China, Koreia Súl, Fijí, Indonesia, Malázia, Portugal no Timor-Leste, liu-liu, Konferensia ba Konselhu Nasional Rezistensia Timor nian, konaba violasaun Direitus Humanus iha Timor-Leste, realiza iha Melbourne/Australia (Abril/1999); Partisipa ih konaba serbisu Komisaun Direitus Humanus  nian, iha Genebra/Suiça (Abril 1999), intervensaun liu-liu ba violasaun sira Direitus Humanus nian durante okupasaun Indonesia; Konferensia Konselhu Nasional Rezistensia Timor nian, konaba situasaun pos Referendu, iha Darwin/Australia (outubru 1999); Konferensia Internasional konaba ema sira nebe Lakon, iha Jakarta/Indonesia (2001), intervensaun konsentra liu ba kestaun ne’e nomos konaba situasaun Direitus Humanus iha Timor-Leste; hetan konvida ba Konferensia Internasional iha Institutu Federaismu nian, iha Suiça, intervensaun konsentra liu konaba “Papel Nasoens Unidas no Ajensia sira iha Rai nebe pos-konflitu” (Agostu 2002) no Konferensia Internasional konaba Jestaun Fronteira iha Tailándia, (2010).

Dra. Isabel da Costa Ferreira kaben ho Antigu Prezidente Republika Demokratika Timor-Leste, no atual Primeiru-Ministru, Taur Matan Ruak, dezde Maiu 2001 no ko’uz oan feto 2 no mane 1 mak Lola, Quesadhip no Tamarisa.

Tuir informasaun husi Gabinete Primeiru-MInistru nian ne’ebe fo sai iha loron 20 juñu ne’e katak kadáver husi espoza Xefe Governu nian sei halot iha Semitériu públiku Becusse iha loron 21 fulan hanesan, hafoin de misa requem iha Igreja Balide.

Reportagem : Eva Ximenes & Joanito Rangel

 27,635 Tatal Lee,  1 Views Today