DÍLI, yokalaumedia.com (25/2023) – Primeiru-Ministru, Kay Rala Xanana Gusmão, simu vizita kortezia ho Ministru Negósiu Estranjeiru Repúblika Singapura, Vivian Balakrishnan, iha Gabinete Fronteira Marítima iha, segunda-feira (24/07).

Iha sorumutu entre Líder rai rua ne’e trata mos  konaba Timor-Leste nia adezaun ba ASEAN.

Vivian Balakrishnan, Ministru Negósiu Estranjeiru Repúblika Singapura, kompromete atu nafatin apoia Timor-Leste nia adezaun ba Organizasaun rejionál Sudeste Aziátiku (ASEAN) refere.

“Singapura respeita tebes no hakarak servisu hamutuk iha futúru, no ha’u agradese tebes bele mai hasoru Primeiru-Ministru, Kay Rala Xanana Gusmão, ema ida ne’ebé ita respeita, nia mak ema ne’ebé luta ba independénsia nasaun ida ne’e”, informa Ministru Vivian Balakrishnan, hafoin hasoru malu ho Primeiru-Ministru Xanana, iha Palásiu Governu.

Governante Singapura, Balakrishnan, mos konsidera líder karismátiku Kayrala Xanana Gusmão, ne’ebe oras ne’e sai Timor-Leste nia Primeiru-Ministru ne’e nu’udar Singapura nia antigu amigu.

Iha fatin hanesan, Primeiru-Ministru, Xanana Gusmão konsidera vizita Ministru Negósiu Estranjeiru Singapura ne’e bele marka pasu pozitivu ida ba atu rai rua bele servisu hamutuk di’ak liu tan iha futuru.

“Agora ami sei hare orgánika Governu nian, no sei diskute Orsamentu Ratifikativu, más hanoin kona-ba futúru depois sei iha nafatin kontaktu, Singapura mós hakarak tau embaixada iha ne’e, maibé molok estabelese sei haree fatin,” katak PM Xanana .

 Xefi Governu timor-oan ne’e mos konsidera Singapura nu’udar país ida ne’ebé fó ezemplu di’ak ba Timor-Leste, iha área lubuk ida, tanba ne’e ita bele koopera di’ak ho Singapura.

Reportagem : Paulo Collo (Kontributór) & Eva Ximenes (Revizora)

 2,625 Tatal Lee,  1 Views Today