Díli, yokalaumedia.com (07/08/2023) – Governu Brunei Darussalam liu husi Embaiaxador ba Timor-Leste, Wan Hadfi Latif, hato’o kompromisiu ne’e bainhira hasoru malu ho Xefe Governu timor oan, Xanana Gusmão, iha nia servisu fatin segunda-feira ne’e.

“Agradese tebes ohin mai hasoru malu ho Primeiru-Ministru, Kay Rala Xanana Gusmão hodi hato’o parabens ba Primeiru-Ministru. Brunei Darussalam ho Timor-Leste hala’o ona relasaun diplomátika dezde tinan 2002, amizade ida ne’e la’o di’ak tebes, no Primeiru-Ministru mós amigu di’ak Brunei nian, nia ba ona Brunei no iha relasaun di’ak ho ami-nia Liurai”,  informa Embaixadór, Wan Hadfi Latif, iha Palásiu Governu.

Diplomata ne’e mos hakle’an liu tan katak sei koordena ho empreza privadu Brunei Darussalam atu servisu hamutuk ho Governu liu hosi Sekretáriu Estadu Polítika Formasaun Profisionál no Empregu (SEFOPE) hodi lori Timor-oan ba servisu iha Brunei.

“Agora sei iha preparasaun no negosiasaun ba akordu refere maibé sira ne’e hotu depende ba Governu Timor-Leste tanba tuir ha’u hatene, SEFOPE rasik iha nia regra katak tenki iha akordu molok haruka traballadór ba nasaun ne’ebé de’it maske kontratu ho kompañia privadu”, nia akresenta.

Nia subliña katak, kona-ba númeru traballadór hira mak presiza depende ba ezijénsia hosi empreza ne’ebé presiza, importante tenke hatene lian Indonézia no Inglés.

Xefe Governu, Kay Rala Xanana Gusmão, reafirma pozisaun IX Governu Konstitusionál sei servisu hamutuk ho Brunei Darusalam iha programa prioridade sira ne’ebé sei implementa iha tinan lima nia laran.

Reportagem : Eva Ximenes

 451 Tatal Lee,  1 Views Today