Díli, yokalaumedia.com (07/08/2023) – liu husi konferensia imprensa nebe hala’o iha salaun enkontru MACLN, Ministru Gil da Costa Monteiro “Oan Soru” hateten bainhira Estadu fo fiar ba nia, prontu atu buka tuir saudozu Nicolau Lobato nia Restui mortal.

Afirmasaun ne’e halo hodi hatan preokupasaun deputadu sira nian konaba ruin saudozu Prezidente Nicolau Lobato ne’ebé to’o agora seidauk hetan.

“Saudozu Nicolau Lobato nia ruin ne’e responsabildade estadu, bainhira ha’u sei asumi kargu sekretáriu estadu ba asuntu kombatente libertasaun nasionál kuandu estadu delega kompeténsia sekretariu estadu hodi reprezenta estadu buka tuir ruin saudozu nicolau lobatu nia, hau hatan siap ami pronto. Tanba koalia konaba ruin, mate barak ba iha ukun rasik an, ruin sira ne’e imposivel ita atu hetan hotu, ida ne’e tenki onestu, ba povu tomak liu-liu ba polítiku sira, se se mak dehan ema mate liu rihun atu rua nia ruin mai hotu kedas ne’e, bele promete kedas mai iha rai lulik ida ne’e. tanba ne’e la fasil atu buka ruin sira ne’e”, dehan Ministru ACLN

Ministru ba Antingu Kombatente Libertasaun Nasionál, Gil da Costa Monteiro “Oan Soru mos reafirma katak ruin barak mak seidauk hetan hanesan massacre santa cruz iha tinan1991, no tinan 1999 mos to’o agora buka seidauk hetan, tanba ne’e husu ba entidade hotu-hotu, nudar timor oan, polítiku sira hotu, servisu hamutuk hodi dezenha modelu valorizasaun ida diak ba martires sira nebe mate ba ukun rasik an maske sira nia restu mortal ita buka la hetan.

Reportagem : Mário da Cruz (Kontributór) & Eva Ximenes (Revizora)

 526 Tatal Lee,  1 Views Today