SEI no UN WOMAN deskute konaba Igualdade Jeneru, empoderamente feto no Inkluzaun

Díli, yokalaumedia.com (10/08/2023)-Sekretariu Estadu Igualdade (SEI) realiza enkontru ho parseria Internasional balun hanesan UN WOMAN hodi kontinua hametin parseria atu atinji Igualdade Jeneru, empoderamente feto no Inkluzaun no hare mos ba programa IX Governu nian, liga liu ba SEI nian.

“Parseria ne’ebe mak ita halo la’os agora, maibe antes ne’e iha ona no agora nafatin atu kontinua hametin parseria ne’e no misaun ne’ebe mak ita iha SEI labele atinji mesak presisa mos parseria”, hateten Elvina Sousa Carvalho, iha Timor Plaza, Kinta-Feira, (10/08).

Governante ne’e mos esplika katak parseria internasional sira mos iha programa tarjetu ba SEI mak Igualdade Jeneru, promosaun Igualdade Jeneru.

“ha’u hakarak hato’o fali komprimisiu Governu nian mak atu hadia  Igualdade Jéneru, protesaun no promosaun direitu umanu feto nian no ami fo importansia ba parseriu hotu-hotu nia apoiu”, sublina Elvina.

Sekretaria Estadu ne’e hakle’an tan IX Governu Konstituisional konsidera igualdade jeneru no empoderamentu feto no labarik feto sira sai nudar asuntu importante iha dezenvolvimentu sosiedade inkluzivu, nune’e bele asegura direitu Feto, Labarik Feto, Ema ho Difisiensia no grupu vulneravel sira atu envolve ativamentu iha dezenvolvimentu ita nia rain.

Iha fatin hanesan reprezentante UN WOMAN, Nishtha Satyam, haktuir ajénsia internasionál refere tau importansia ba programa prioridade IX Governu Konstituisional  nian ne’ebe liga liu ba sekretariu Estadu Igualdade kompeténsia.

“Hau kontente tebes UN WOMAN mai hasoru Sekretária Estadu ba Igualidade Jéneru hodi servisu hamutuk liu-liu tau importansia ba programa governu nian”, hateten Nishtha Satyam.

UN WOMAN prontu atu apoiu programa prioridade Sekretária Estadu ba Igualidade Jéneru nian durante 120 nia laran no mos sei tau importansia ba feto nia partisipasaun iha polítika.

Reportagem : Eva Ximenes

 1,868 Tatal Lee,  1 Views Today