Díli, yokalaumedia.com (14/09/2023) – Primeiru-Ministru (PM), Kay Rala Xanana Gusmão informa ba Xefe Estadu konaba apoiu solidariedade profunda dolar millaun 2,5 ba povu reinu Marrokus ne’ebe sofre dezastre Natural kauza husi rai nakdoko ne’ebe akontese iha sexta-feira kalan, 08 fulan setembru tinan 2023 .

Rai nakdoko iha reinu Marokkus ho nia magnitude 6,8 hodi harahun pais ne’e hamate ema besik 2.800 no hakanek ema besik 2.500 no ema rihun ba rihun mak lakon no ekipa salvamentu kontinua iha terrenu hodi buka sobrevivente sira.

Akontesimentu natural ida ne’e hanesan rai-nakdoko mortíferu liu (boot liu) iha Marrokus, husi kedas rai nakdoko ne’ebé estraga sidade Agadir, iha tasi-ibun osidentál país ne’e nian, iha tinan 1960, iha ne’ebé hamate ema liu rihun 12.

Relasiona ho dezastre natural ne’ebe mak akontese ona iha reinu Marrokus iha loron 13 fulan setembrune’e, liu husi sorumutu konsellu ministru nian, lideradu husi Primeiru-Ministru Kay Rala Xanana Gusmão, aprova ona dolar amerikanu milloins 2,5 hanesan atribuisaun donativa ida ba reinu Marokkus, atu apoia esforsu sira hodi hatan ba destruisaun ne’ebe kauza husi rai-nakdoko ne’e. Entretantu, iha tempu badak Governu timor-oan sei haruka osan, apoiu humanitária, ho montante dolar milloens 2,5 ne’e ba Marroku.

Tuir publikasaun sira husi média Internasional balun hanesan euronews.com, loron 13/09 ne’e, katak Ministériu Interior Marroku rejista ona  vítima mortal 2.946 no kanek hamutuk 5.674 no pur volta 2.944 mak sei lakon tanba hanehan husi destrosu sira.

Komunidade internasionál mos hahu mobiliza ona asisténsia ba Marroku, maibe foin mak autoriza ba nasaun 4 hanesan España, Reinu Unidu, Qatar no uniaun Emiradu Árabe hodi apoia operasaun koordenada atu buka no halo resgate ba sobrevivente sira.

euronews.com mos informa katak númeru vítima sei aumenta tanba terramotu ne’e mos atinji área foho sira ne’ebe difísil atu asesu no rejiaun sira ne’ebe besik Marrakexe hanesan Al Haouz, Agadir, Ouarzazate no Taroudant.

publico.pt, média portugeza ida, katak Institutu Nasional Geofísica Marroku nian fo sai katak rai nakdoko ne’e ho magnitude 7,0 eskala de Richter, atinji mos rejiaun Marrakexe ho nia episntru besik Ighil, situa kilometru 80 husi sudeste Marrakexe iha tuku 23:11 Oras lokal nian. Entretantu dadus ne’ebe rejista husi servisu geológiku Estadu Unidu nian katak rai nakdoko ne’e ho nia magnitude 6,8 eskala de Richter no nia profundidade kilometru 18.

Reportagem : Eva Ximenes

 2,590 Tatal Lee,  1 Views Today