Dili, yokalaumedia.com (14/09/2023) – Prezidente Komisaun Funsaun Públika, Faustino Cardoso Gomes, hasoru malu ho Vise primeiru-Ministru, MCDAS no MDRHC, Mariano Assanami sabino, hodi ko’alia konaba estrutura orgánika, diploma ministeriál no inklui koloka pesoál adekuadu, profesionál no merito iha ministériu foun ne’ene Vice-Xefe governu ne’e lidera, iha palásiu governu,Dili.

Durante sorumutu ne’ebe hala’o besik oras ida ne’e hodi koalia kona-ba nesesidade forsa traballu ba priénxe estrutura orgánika ministériu CDAS no Ministériu DRHC, nune’e bele garante funsionamentu instituisional tuir polítika IX governu nian.

“atu asenta hamutuk kestaun sira ne’ebé ligadu ho nesesidade ba forsa traballu atu oinsa mak bele priénxe estrutura orgánika ministériu foun ne’e nian hodi nune’e bele  funsiona normál, hodi halao mandatu ne’ebé mak ministériu ne’e iha. Komisaun Funsaun Públika entende katak presiza tenke iha informasaun, presiza klarifika atu oinsa mak priénxe estrutura orgánika sira liu husi destakamentu, rekezisaun no ida seluk mak liu husi rekrutamentu”, esplika Prezidente KFP, Faustino Cardoso, ba jornalista sira iha palásiu governu, kinta feira (14/09) ne’e.

Prezidente klarifika liu tan katak diploma ministeriál mak sai baze ba komisaun funsaun públika bainhira simu proposta nomeasaun sira hodi bele asegura legalidade.

“destaka muito bem, sira nia hakarak atu oinsa mak, avansa ho destakamentu maibe la taka dalan para atu ikus mai ministériu asumi responsabilidade ho ninia pesoál rasik liu husi halo dalan rekrutamentu laos ne’e de’it, komisaun ohin mos koalia konaba kestaun atu oinsa mak ministériu iha lalais ninia estrutura orgánika, ninia diploma ministeriál sira atu hodi nune’e sai nudar baze legal ida atu komisaun funsaun públika banati bainhira simu proposta nomeasaun sira hodi asegura legalidade tantu ba funsionáriu nune’e mos ba kargu diresaun xefia sira”, akresenta nia.

Ulun bo’ot Funsaun Públika nian ne’e mos afirma liu tan katak presiza koloka  kuadru pesoál ida ne’ebé adekuadu atu bele asegura efisiénsia, efikásia, profesionalizmu no meritokrasia iha ministériu refere

“oinsa mak iha kuadru pesoál ida ne’ebé mak adekuadu katak presiza iha kuadru pesoál ida mak hala’o servisu bazeia ba nesesidade mandatu ho analiza ho kle’an atu asegura efisiénsia, efikásia, profesionalizmu, meritokrasia iha pesoál, iha ministériu ne’e nian no vise primeiru ministru no ministru anota kestaun kona oinsa mak bele servisu hamutuk iha ámbitu prosesu prenximentu ba iha estrutura orgánika ne’ebé iha ho pesoál sira ne’ebé mak adekuadu, kaulifikadu no profesionál”, nia afirma.

Faustino mos konfirma komisaun funsaun púbiku nia prontu atu fó apoiu, prontu para  atu servisu hamutuk iha ámbitu ida ne’e.

Reportagem : Apolinário da Costa

 1,869 Tatal Lee,  1 Views Today