Díli, yokalaumedia.com (18/09/2023) – Reprezentante Austrália ba Greater Sunrise, Steve Bracks, hasoru malu ho Primeiru-Ministru (PM), Kay Rala Xanana Gusmao, ho Ministru Petróliu no Rekursu Minerais (MPRM), Francisco da Costa Monteiro, hodi ko’alia asuntu ligadu ho maneira atu dezenvolve projetu Greater Sunrise.

Steve hateten nasaun Austrália rekoeñese katak dezenvolvimentu Greater Sunrise importante tebes ba ema Timor.

“Ami iha kompromisiu atu servisu hamutuk ho Timor-Leste hodi dezenvolve projetu Greater Sunrise no ami mos iha maneira viavél ba projetu ne’e ho komersiu no teknikamente”, hateten Reprezentante Austrália ba Greater Sunrise iha palasio Governu, Segunda-feira, (18/09).

Reprezentante ne’e mos haktuir Austrália nia hakarak atu governu bele lori Greater Sunrise mai Timor-Leste maibe Australia tenki hare mos ba estudu viabilidade ekonomiku nian.

“ami komprende Governu ida ne’e nia deseju atu lori projetu Greater Sunrise mai Timor-Leste, maibe ami tenki haree mos ba estudu ne’ebe agora daudaun realiza ba viabilidade ekonómiku ne’ebe fornese ba Timor no ba kompaña sira ne’ebe involve iha projetu ne’e”, subliña Steve.

Alein de ne’e mos Timor-Leste hola ona asaun sira husi kompaña ConocoPilips no agora dadaun Timor GAP mak kaer projetu ne’e no Australia hakarak servisu hamutuk ho kompaña sira ne’ebe mak involve iha projetu ne’e.

Reportagem : Eva Ximenes-

 3,458 Tatal Lee,  1 Views Today