Papa Francisco konfirmadu vizita TL

Vatikanu, yokalaumedia.com (24/01/2024) – Prezidente Repúblika (PR), José Ramos Horta ba dahuluk hala’o enkontru ofisial ho amu Papa Francisco hodi konfirma atu mai vizita Timor-Leste iha tinan ida ne’e.

“ha’u enkontru ofisial ida ne’e primeira-vez ha’u hanesan Xefe de Estadu mai hasoru amu Papa Francisco konfirma katak tinan ne’e nia sei mai vizita Timor-Leste”, hateten Xefe estadu, José Ramos Horta, iha Vazilika Santa Marta Vatikanu, Segunda-Feira (22/01).

Iha enkontru ne’e amu Papa hatete katak nia kontente ho Timor-Leste nia  hadomi, nia akompaña ho situasaun di’ak, koñese Timor-Leste no amu Papa konfirma hakarak atu vizita Timor-Leste iha tinan ida ne’e.

Tuir Komunikadu Imprensa ne’ebe ekipa yokalaumedia.com asesu husi GPR nian katak Xefe Estadu mos sei trata ho papa no gabinete papal konaba data ofisial ba vizita refere inklui mos komunikasaun entre Santa Se, Governu no Igreja Timor-Leste mak sei anúnsiu ofisialmente data no programa sira ne’e.

Horta mo’s informa katak Delegasaun husi Vatikanu sei ba Díli no too iha loron 26 fulan Janeiru tinan ne’e hodi prepara kondisaun ba vizita papal ne’e.

“ha’u hatene data husi vizita ne’e, maibé labele fo sai tamba tuir protokolu Santa Se, Governu no Igreja Timor-Leste mak konjuntamente sei anúnsia”, Subliña Ramos.

Horta mos husu timor-oan atu reza ba amu Papa Francisco nia saúde nune’e bele vizita Timor-Leste iha tempu ne’ebe mak determinadu ona.

Reportagem : Eva Ximenes

 326 Tatal Lee,  1 Views Today