Geneva/New Delhi, yokalaumedia.com (24/01 /2024) – Saima Wazed ohin ofisialmente simu kargu hanesan Diretora Rejionál Organizasaun Mundial Saúde (OMS) ba Sudeste Aziátiku husi Konsellu Ezekutivu OMS iha Jenebra, Suisa.

Hafoin halo juramentu nu’udar Diretora Rejional foun, Wazed iha nia diskursu aseitasaun iha Konsellu Ezekutivu OMS nian hatete: “Hau hakarak agradese ba Estadu-Membru sira tanba sira tau ona fiar ba ha’u. Iha serbisu barak atu halo, no ha’u kontente tebes atu hahú viajen ida-ne’e ho imi hotu. Ha’u kontente ho buat hotu ne’ebé ita bele no sei bele halo hamutuk iha tinan hirak oin mai”, Diretora Rejional Organizasaun Mundiál Saúde (OMS), Saima Wazed, hato’o liu husi nia diskursu, iha Zeneva, tersa-Feira (23/01).

Wazed hahú nia mandatu ba tinan lima iha loron 1 Fevereiru 2024. Nia mak ema dahuluk husi Bangladesh no feto daruak ne’ebé kaer pasta hanesan Diretora Rejionál OMS nian Rejiaun Sudeste Aziátiku. Nia hetan nomeasaun nu’udar Diretora Rejional haktuir votasaun husi Komisaun Rejional Sudeste Aziátiku iha loron 1 Novembru 2023 iha New Delhi, India.

“dahuluk liu ita sei foku maka’as ba asuntu saúde mentál, aréa ne’ebé ema la tau matan iha tempu naruk nia laran. Tempu to’o ona atu luta hasoru moras saúde mental ne’ebé dalabarak ema la ko’alia, ne’ebé afeta ita-nia moris iha aspetu hotu-hotu. Ha’u sei esforsu hodi asegura paridade entre saúde fíziku no mental iha ita-nia sistema saúde, “Daruak, ha’u planu atu dezenvolve no implementa intervensaun espesífiku ba feto no labarik sira, inklui feto isin-rua sira. Ida ne’e sei kria ho edukasaun, empoderamentu no prevensaun. Servisu estruturadu ho aprosimasaun ba kursu moris, ida-ne’e sei inklui ezaminasaun ba moris-di’ak no saúde ne’ebé komprensivu, programa vasinasaun no nutrisaun, promosaun ba saúde fíziku no mentál, no reziliensia,” Subliña Diretora liu husi komunikadu Imprensa ne’ebe publika husi OMS.

Kualkér susesu ne’ebé ita atinji iha área ida-ne’e sei iha impaktu no benefísiu multi-jerasaun nian ne’ebé potensialmente sei liberta ita hotu. Diretor Rejional foun hateten katak susesu iha área ida-ne’e sei mai liuhusi sosiedade sira, nune’e mós hadi’a komunidade sira-nia saúde, sosiál no ekonómika, hateten Diretora foun ne’e.

Terseiru mak uza teknolójia, Rekursu bo’ot liu iha ita-nia moris iha dekade hirak ikus ne’e permite posibilidade no inovasaun iha área saúde publika oin-oin. Impaktu husi revolusaun dijitál ba kuidadu saúde nian iha promesa bo’ot , hahú husi telemedisina no monitorizasaun pasiente via dijitál to’o diagnosa bazeia ba dadus no personalizasaun ba planu tratamentu, nia dehan.

Wazed subliña iha parte parseria, kolaborasaun no finansiamentu ne’ebé transparente, sustentável, no fornese retornu adekuadu ba investimentu.

 Ninia área prioridade sira seluk inklui – Kobertura saúde universál – haforsa sistema saúde bazeia ba aprosimasaun Kuidadu Saúde Primaria; monitoriza dezigualdade saúde hodi identifika no halo monitorizasaun ba populasaun sira ne’ebé iha dezafiu; foka ba evidénsia no dadus hodi formula aprosimasaun sira ne’ebé orientadu ba igualdade no responde ba nesesidade grupu hotu-hotu nian atu asegura katak ema hotu iha asesu ba servisu ho kualidade hanesan ho ema seluk.

Responde emerjénsia no preparasaun hasoru pandemia – enkoraja nasaun hotu atu servisu hamutuk hanesan sosiedade ida ba preparasaun hasoru pandemia no responde, partikularmente planu husi nível oioin ba preparasaun hasoru pandemia ne’ebé mós liga ba haforsa sistema saúde.

Kolaborasaun no parseria : rejionál no multisektorál – promove involvimenti ativu iha edukasaun, ekonomia, sosiál, hasai husi ki’ak no dezenvolvimentu no setór regulatóriu oioin haktuir planu nasaun membru estadu nian. Halo parseiru ho setór oioin hodi resolve problema saúde hotu.

Monitoriza no relata progresu – atu harii dadus ne’ebé inovativu no espesífiku ba kontestu no sistema relatoriu hodi sukat implementasaun estratéjia sira no hadi’ak liutan iha foti desizaun. Estabelese kolesaun dadus iha dezigualdade jéneru, dezafiu sosioekonomikus, no problema espesifiku sira ne’ebé hasoru husi ema indíjenou sira, refujiadus no populasaun imigrante tanba konflitu, ekonomia no krize ambientál.

Mudansa klimátika – dezenvolve asaun sira hodi prevene no mitiga liuhusi integra medida mudansa klimátika ba polítika nasionál, estratéjia no planu sira. Monitoriza impaktu saúde husi mudansa klimátika no prioritiza rejilénsia setór saúde ba mudansa klimátika.

Foku ba grupu no ema vulneravel sira : liuhusi prioritiza sira-nia nesesidade espesífiku iha planu ba infrastrutura saúde hodi fornese servisu preventivu nune’e mós kurativu, hodi asegura katak laiha ema ida husik hela iha kotuk.

Konaba Diretór Rejionál foun Saima Wazed iha lisensiatura husi Barry University iha Florida, EUA no mestradu iha psikolojia klinikál. Nia mos hanesan kandidata ba doutoramentu iha Lideransa Organizasionál iha universidade ne’ebé hanesan.

Wazed hetan nomeiasaun hanesan Embaixadora Boa Vontade ba Autizmu iha OMS rejiaun Sudeste Aziátiku iha 2017. Nia hamutuk hodi hakerek Estratéjia OMS Sudeste Aziátiku ba Autizmu iha tinan ne’ebé hanesan.

Nia hanesan Asosiadu iha Global Health Program Chatam House, UK, Prezidente ba Komisaun Konsultivu Nasionál ba Autizmu no NDDs, Dhaka Bangladesh, no Prezidente ba Fundasaun Shuchona, Dhaka, Bangladesh.

Wazed hetan prémiu “Exelénsia iha Saúde Públika” husi OMS Rejiaun Sudeste Aziátiku iha tinan 2014, no medalia osan mean Ibrahim iha 2016 husi Konsellu Dr. Ibrahim Memorial Council, Bangladesh, ba nia servisu di’ak iha autizmu no disornenasaun ba dezenvolvimentu neuro.

Iha tinan 2017, Wazed simu prémiu internasionál husi organizasaun Shema Kolain- EUA ba nia servisu iha Autizmu iha Sudeste Aziátiku. Iha 2019, nia hetan prémiu inovativu ba Lideransa Feto iha Saúde Mental Global husi Global Mental Health Programs, Universidade Columbia EUA.

Reportagem :Eva Ximenes

 708 Tatal Lee,  1 Views Today