Antígua-Barbuda yokalaumedia.com (𝟑𝟏/05/2024) – Timor nia pozisaun ne’e hato’o husi Primeiru-Ministru, Kay Rala Xanana Gusmão, ne’ebe akompanhadu mos husi Ministru Negósius Estranjeirus no Kooperasaun (MNEK), Bendito dos Santos Freitas, bainhira hala’o enkontru kortejia ida ho Sekretáriu-Jerál ONU, António Guterres, iha Antígua no Barbuda, hafoin partisipa iha Konferénsia Internasional ba dahat Estadu Illa Ki’ik iha Dezenvolvimentu.

Timor-Leste ne’ebé Reprezenta husi Xefe Governu, Kayrala Xanana Gusmão no Ministru Negósius Estranjeirus no Kooperasaun, Bendito Freitas, propoin atu Sekretáriu-Jerál Organizasaun Nasoens Unidas (ONU), António Guterres, eleze eis Prezidente Repúblika Indonézia, Susilo Bambang Yudhoyono (SBY), lidera “Komisaun bá Paz”, hodi solusiona krize polítika no militár ne’ebé dadauk ne’e akontese iha Myanmar.

“Proposta ne’e, Timor-Leste apresenta tanba lider Indonéziu ne’e iha passadu konsege hakotu junta militar iha Myanmar hodi avansa ba eleisaun ne’ebé lívre no demokrátiku, no liu husi eleisaun refere Aung San Suu Kyi mak manán”, justifika Xanana, sita husi komunikadu Imprensa publikadu iha pájina ofisial MNEK sexta-feira (31/05) nee.

Pedidu nomesaun refere mós Timor-Leste aprezenta ho estatútu hanesan observadór ba ASEAN, atu Estadu Membru ASEAN sira tur hamutuk ko’alia ba malu, nune’e hakotu tiha konflitu étniku no militár ne’ebé akontese iha Myanmar.

Proposta refere atu reforsa liután pozisaun Timor-Leste nian ne’ebé antes ne’e, Prezidente Repúblika, José Ramos-Horta, ko’alia ona ho Sekretáriu-Jerál ONU, António Guterres, nune’e bele aselera prosesu.

Hafoin rona tiha Timor-Leste nia pozisaun, Sekretáriu Jerál ONU, António Guterres konfirma katak, ONU hili ona eis Ministra Negósiu Estranjeru Austrália, Julie Bishop, atu lidera komisaun refere, maibé assuntu ne’e sei iha hela prosesu diskusaun nia laran.

Reportagem : Eva Ximenes

 1,218 Tatal Lee,  1 Views Today