Díli, yokalaumedia.com (20/11/2024) – Autoridade Seguransa Polísia Nasionál Timor-Leste (PNTL) liu husi Unidade Patroillamentu Fronteira (UPF) halo operasaun hodi kombate krime kontra bandu ne’ebé akontese kada tinan iha liña fonteira terestre, maibé difisil tanba espasu ne’ebé luan liu ho rekusu humanu ne’ebé limitadu.

Komanadante Jerál PNTL Komisariu Jerál Polísia Henrique da Costa haktuir katak komandu Unidade Patrullamentu Fronteira halo servisu seguransa em kooperasaun ho F-FDTL Munisípiu sira iha fronteira Terrestres atu halo prevensaun ba krime kontra bandu hatama sasán ilegal.

“Ita hotu hatene liña Fronteira Terrestres rai maran ho tasi, luan tebes, dala ruma ita halo operasaun taka iha fatin ida sira halo aktividade kontra bandu liu fali iha fatin seluk, tanba ita nia rekursu humanu limitadu, ita difisil atu responde ba fronteira ne’ebé luan tebes,”  dehan Henrique ba jornalista iha sentru Formasaun Akademia Polísia komoro.

Nia mos afirma katak, maske Autoridade Seguransa hasoru difikuldades ba Rekursu Humanu, maibe PNTL nafatin halo servisu, bainhira sidadaun sira hatama sasán kontra bandu tama mai Timor-Leste, polísia hetan iha fatin ne’ebé de’it sempre halo aprensaun no prosesu tuir dalan legal.

“Sasán kontra bandu sira ne’e tama ita hela iha Munisípiu ne’ebé de’it iha prende hanesan sasán sigaru ho fugetes sira ne’e, entaun agora ita fo ona orientasaun ba komandante PNTL Munisípiu Dili ho Unidade sira hotu atu halo operasaun vizilansia makas iha pontu entrada Fronteira hodi haree sasán kontra bandu ho fugetes, tanba atu tama mai Dili iha Munisípiu ne’ebé de’it iha hetan halo aprensaun ba evidensia sira ne’e halo prosesu tuir dalan legal,” afirma nia.

Iha fatin hanesan Komandante Unidade Patrullamentu Fronteira (UPF), Superintendente Assistente Polísia Euclides Belo hateten UPF halo vizilansia no seguransa liu liu iha Fronteria Indonezia ho Timor Leste nian hodi evita sasán kontra bandu tama ilegal.

“Seguransa ne’ebé halao mak ami sempre halo fiskalizasaun/check point, tanba ita nia komunidade sira ne’ebé mak sempre halo atividades kontra bandu hatama fugetes sigaru sira uza meius oioin balu hatama liu husi tasi, balu liu husi rai maran, sasan sira hanesan fugetes ne’ebé mak sut ida ka rua ne’e, sira subar iha kareta nia roda  nia janti,tau iha roda laran depois taka ho janti kompletu sira tula ho kareta dala ruma to’o Dili mak ita foin kaptura, tanba area fronteira ne’ebé luan tebes “, informa nia.

Iha loron-19 fulan ne’e UPF mos konsege halo aprensaun ba sasan sira hanesan sigaru ho fugetis ne’e sidadaun balun importa ilegalmente husi Indonézia.

“Ita iha loron 19 Novembru ita konsege detekta sidadaun balun no ita halo kedas atuasaun  ba sasan hirak ne’e hanesan Kareta no nia roda ne’ebé mak sira subar fugetis no sigaru ami konsege prende. Nain ba sasan sira ne’e hatene katak bainhira ita halo check point iha estrada nubadak sira hare no sira ses aan husi  fatin, entaun Ita prende tau hela depois ita kanaliza Polisia Komando Bobonaru nian entrega ba Seksaun investigasaun, tanba ne’e total husi sasan ne’e ami seidauk Konta hotu,” Euclides informa.

Nia sunliña katak planu operasaun  Komandu Jerál PNTL fo sai UPF no servisu hamutuk ho Komandu Munisipiu tolu nafatin halo vizilansia iha fronteira no mos kontinua koordena ho TNI mantem seguransa iha liña fronteira TL-Indonézia.

Repórter : Jonito Rangel

 124 Tatal Lee,  1 Views Today