Díli, yokalaumedia.com (17/07/2023)-Consellu Imprensa (CI), Apresia ho nota komunikasaun Sosiál husi Konsellu Superiór Ministériu Públiku (KSMP), hodi halo diretu resposta no halo klarifikasaun kona ba notifikasaun ba jornalista no xefe redasaun média online Hatutan.com

Prezidente CI, Otelio Ote hateten, iha fulan hirak ikus ne’e, iha nótisia balun sai konsumu públiku no Conselhu Imprensa tau mos atensaun ba Públikasaun sira ne’ebe média iha, entre ida mak públikasaun média Hatutan.com nia nótisia foku liu ba deskonfia Prokuradór Jerál Repúblika ho nia assesór Jurídiku utiliza osan estadu hodi viajem privada ba Portugál.

Entretantu, tuir prezidente CI, Otélio Ote, katak  média la presija hetan xamada hodi ba fo klarifikasaun iha prokuradoria ka tribunal, kuandu públika informasaun ruma.

“prosedura ne’ebe presisa halo tuir mak lei komunikasaun sosiál. Asuntu saida de’it mak mosu tamba rezultadu husi produtu jornalístiku, tenki rezolve tuir prosesu jornalístiku liu husi dalan direitu resposta no ratifikasaun atu bele haloos tiha públikasaun ne’ebe provoka insatisfasaun individuo ou públiku”, hateten Prezidente CI, Otelio Ote, iha salaun Konferénsia CI, Quintal Bo’ot, Segunda-Feira, (17/07).

Iha sorin seluk, Presidente Konsellu Imprensa ne’e mos apresia ho desizaun ministériu públiku nian ne’ebe produz fali nota kalrifikasaun hasoru Jornalista no Xefe Redasaun hatutan.com.

“CI apresia dezisaun ida ne’ebe husi konsellu Superiór Ministériu Públiku, tamba ida ne’e sai hanesan ezemplu diak ida ne’ebe mak instituisaun Governu, Privadu, sosiedade civil presija la’o tuir”, apresia Ote.

Otélio Ote mos klarifika liu tan katk direitu resposta no ratifikasaun ne’ebe iha ona ne’e, média iha dever atu hatur sira nia dever hodi publika liu husi meius ida ne’e mak atu prevene jornalista ba iha tribunál no prevene kriminalizasaun produtu jornalístiku.

Iha Fatin hanesan Konselleiru CI, Benevides Correia Barros, husu ba líder sira iha órgaun soberanu hanesan legislativu, ezekutivu no judikativu atu loke an hodi públiku bele kontrola.

“públiku atu kontrola sira ne’e mak liu husi servisu jornalista sira nian ne’ebe hakerek no publika informasaun konaba sira nia servisu tanba ne’e públiku nia direitu atu hatene”, afirma Benevides.

Konselleiru ne’e mos klarifika liu tan katak lei komunikasaun sosial limite de’it mak informasaun ne’ebe hafo’er ema nia naran di’ak, dezonrar ema seluk, hatun ema nia reputasaun, la respeita prejunsaun de Inusénsia, la kumpre ba segredu justisa no segredu estadu, ne’ebe define no regula iha artigu 11.

Benevides mos kontinua husu nafatin ba líder sira hotu atu fo fatin ba jornalista sira atu asesu ba informasaun hodi nune’e bele fo sai ba públiku.

“dirijente sira instituisaun públiku sira tenki fo biban, tenki fo fatin ba jornalista sira atu asesu ba informasaun”, husu Benevides Barros.

Benevides Correia Barros mos kontinua alerta ba jornalista sira atu labele viola kódigu deontolójika jornalista nian bainhira atu hala’o servisu.

Reportagem : Eva Ximenes

 1,544 Tatal Lee,  2 Views Today