Liquiça, yokalaumedia.com (02/09/2023) – Dewan Solidaritas Mahasiswa Pemuda Pelajar Timor Timur organiza semináriu hodi hanoin hikas kontribuisaun DSMPPTT, iha tinan 25 liubá, no atividade refere hala’o iha salaun sentru tokodede.

Ministru Asuntu Kombatetente Libertasaun Nasionál (MACLN-Sigla Portugéz), Gil da Costa “Oan Soru” hateten katak sertifikadu ne’ebé membru sira simu ne’e la to’o atu valoriza sira nia kontribuisaun, maibé tenki hakerek istória hodi nune’e sei rai memória ida ba jerasaun ba jerasaun, istória valoriza husi hakerek livru la’os deit rai hela deit simu medalha kondekorasaun.

 “ha’u la konkorda ho liafuan vitíma. Tanba Timor oan la’os sai vitima ba nia rasik maibé timor oan sai heroi  ba ukun rasik-an, sertifikadu ne’ebé DSMPPTT simu  la’os timor oan hotu simu, sertifikadu ne’e asina husi Comandante Em Chefe Das Falintil  Kayrala Xanana Gusmão hanesan rekonheñesimentu ba DSMPPTT nia kontribuisaun ba luta ukun rasik-an, sertifikadu ne’e asina husi lider nasionál Xanana Gusmão tanba laiha tan Xanana seluk iha timor tanba Xanana iha timor ida deit”, hateten MACLN iha salaun Sentru Tokodede, Likisa, Sabádo, (02/09).

Governante ne’e mós rekoñese Frente Revolusionariu de Timor-Leste Independente (FRETILIN), Forsa Armada Libertasaun Nasionál Timor-Lorosa’e (FALINTIL), Conselho Revolucionário da Resistencia Nacionál (CRRN), Conselho Nacionál da Resistencia Maubere (CNRM) no Congresso Nacionál de Recunstrução de Timor (CNRT) mak sai mahon bo’ot ba Timor-Leste nia luta ba ukun rasik-an. mós agradese ba organizasaun rezistensia hotu ne’ebé kontiribui ba luta Timor-Leste nia.

Prezidente DSMPPTT munisípiu likisa, Domingos da Conceiçao “Maukaro”,  hatete liafuan ukun rasik-an, fasil atu temi, tan ema rihun atus rua mak tenki lakon vida, fakar ran hodi sosa liafuan lulik ne’e.

“iha luta ukun rasik-an iha buat rua mak sei hasoru, mate ou moris, mate sei rai hela istória no moris karik sei konta istória, ema sira ne’ebé moris  hetan asaun brutalismu husi militar indonézia hanesan hetan torturasaun, intimidasaun no kastigu”, hateten Maukaro.

Prezindete Conselho dos Combatentes da Libertacão Nacionál (CCLN), Munisípiu Likisa, Vicente da Conceição “Rai Los”, husu ba DSMPPT atu submete estrutura ba iha CCLN munisípiu likisa, hodi nune’e ejistensia organizasaun resisténsia ne’e bebe kontribui ba dezenvolvimentu nasaun iha futuru.

“uluk DSMPPTT kontribui ba iha luta ba ukun rasik-an, no tempu agóra DSMPPT kontinua luta hodi kontribui ba dezenvolvimentu nasionál”, husu Railos.

Antero Bendito, nu’udar Oradór, iha nia intervensaun hatete DSMPPT iha liafuan solidaridade, solidariedade hanesan vizaun ida, oinsa atu servisu hamutuk, tulun malu,fasilita membru  disiplina, no oinsa membru sira organiza servisu iha baze, halo sosializasaun kona-ba luta ba ukun rasik-an.

Dewan Solidaritas Mahasiswa Pemuda Pelajar Timor-Timur (DSMPPTT) moris iha loron 8 fulan jullu 1998, membru dewan  ne’ebé simu sertifikadu rekoñesimentu orden Komandante em Chefe das FALINTIL Kayrala Xanana Gusmão hamutuk 102.

Reportagem : Eva Ximenes

 6,572 Tatal Lee,  1 Views Today