Díli, yokalaumedia.com (18/10/2023) – ANCI-TL preokupa ho kazu infantesida (kazu soe bebe) ne’ebe hatudu katak Timor-Leste tama ona iha faze extra-ordinariu tanba organizasaun ne’e rejista ona kazu hamutuk 49 sura husi tinan 2015-2020.

Entretantu, iha loron 3 outubru foin lalais ne’e akontese tan kazu soe bebe ne’ebe akontese iha suku Motael. Relativamente ho akontesimentu ne’e, Organizasaun Aliansa Nasional Luta Kontra Krime Infantesidu Timor-Leste (ANCI-TL/sigla Portugéz), husu ba lejislador sira atu revé lei ne’ebe bele kriminaliza kazu refere hafoin halo evaluasaun no investigasaun durante semana 2 no iha loron 15 outubru ne’e kanaliza ona ba Ministériu Públiku.

 “ita hotu akompaña depois de liu husi ezaminasaun hatudu katak bebe ne’e nia kondisaun ita labele salva, iha ezaminasaun sinal hatudu katak bebe nia estrutura isin lolon husi parte kakorok husi lo’os hetan pankada ga baku husi ema deskuñesidu ne’ebe mak halo asaun hodi hakotu bebe nia vida no iha dia 6-7 fulan outubru ne’e husi parte Aliansa hahu elabora ona prosesu ne’e no ohin ita bele fo sai ba média ninia prosesu ezaminasaun ka liu-liu ba kazu refere”, haktuir Diretor Ezekutivu ANCI-TL, Jose Turki, iha FONGTIL, Kuarta-Feira (18/10/2023).

Turki mos husu atu Polísia no parte relevante sira atu kaptura autór ne’ebe mak so’e bebe  hodi submete no prosesu tuir lei ne’ebe mak ejiste.

“sasukat husi ne’e referensia hatudu mai ita katak iha tinan 2023 ita klasifika Timor-Leste hanesan ona nasaun ne’ebe mak krime infantisidiu liu-liu violasaun husi ita nia sidadaun deskuñesidu hakotu bebe nia vida tama ona iha estra ordinariu, ita mos presisa halo esforsu advokasia ne’ebe mak estra-ordinariu ho ekcelente atu fo resposta emediata ba asuntu ne’e, no rezultadu peskiza hatudu katak iha Timor-Leste iha munisípiu 5 mak sai Tarjetu ba kazu refere hanesan Munisípiu Díli, Baucau, Viqueque, Lautem no Ainaro”, subliña Jose.

Konstituisaun Repúblika Demokrátika Timor-Leste (KRDTL), iha artigu 18 ho 29 fo hela espasu ba familia, inan-aman, sosiedade iha papél obrigatoriu atu bele proteje, liga mos ho rezulusaun assembleia Jerál númeru 44/25, 20 de Novembru 1989 artigu 1 hateten katak labarik mak ho idade 18 mai kraik, inklui bebe ne’ebe iha inan nia knotak, estadu, inan-aman no sosiedade iha obrigasaun fo protesaun.

Iha konfeénsia ne’ebe realiza iha Kinta-feira (18/10) ne’e, iha FONGTIL, ANCI-TL rekomenda ba parlamentu Nasionál haree konaba lejislasaun ne’ebe kriminaliza kazu infantesida iha Timor.

“ami rekomenda ba parlamentu Nasionál atu halo revizaun ba kódigu penál, tanba durante ne’e ita nia baze legál liu-liu artigu 142-143 iha kódigu penál ninia penalidade aplika de’it ba autór feto, durante ne’e ita hotu akompaña kazu hirak ne’e akontese ita nia públiku kestiona mak autór feto mak sala, feto mak la iha responsabilidade, maibe ita hotu hatene kestaun psikolojikamente bainhira feto ida isin rua ka hetan bebe ida konsekuensia rezultadu mai husi feto ida no mane ida ninia konkordansia maibe iha ita nia baze legál lubuk ida la integra la fo aplika penalidade ne’ebe mak regurozu oinsa mak atu kriminaliza ita nia autór mane sira”, rekomenda Jose.

Organizasaun ANCI-TL rekomenda mos ba Governu atu konsidera iha rezolusaun nú 10/2020, ne’ebe ko’alia konaba pontu importante 8 ida mak implementa edukasaun seksuál no edukasaun reprodutivu iha eskola sira hotu atu hasa’e joven sira nia koñesementu atu halo prevensaun ne’ebe mak efetivu ba asuntu infantesidu. No rekomenda mos igreja atu produz mensajem edukativu iha atividade relijiozu sira atu bele kombate asuntu infantesidu refere.

Reportagem : Eva Ximenes

 6,372 Tatal Lee,  1 Views Today