Díli, yokalaumedia.com (15/02 /2024) – Prezidente da Repúblika husu atu Ministru Justisa, Sérgio de Jesus Fernandes da Costa Hornai, atu ajuda governu halo reforma setór judiasiáriu iha Timor-Leste.

Pedidu ne’e hato’o husi Xefe Estadu, José Ramos Horta, bainhira fo pose ba Ministru Justisa Sérgio de Jesus Fernandes da Costa Hornai, ne’ebe sustitui maktoban Amandio de Sá Benevides, ba mandatu 2024-2028 iha Palásiu Prezidensiál Díli ne’ebé asiste hosi, membru governu, korpu diplomatiku no familia sira.

“ita hotu hatene katak setor justisa hanesan pilar importante iha estadu direitu demokrátiku. Setor justisa tenki ida ne’ebe kompetente, independente, parsial, ho ida ne’e mak hatene halo balansu no ekilíbriu ba faktu sira tuir sirkunstánsia hodi justisa ida di’ak ba sidadaun sira, tanba atu lori povu ba fiar fali sistema justisa”, dehan PR Horta.

Premiadu Nobel ba Paz ne’e mos kontinua husu governante ne’e atu servisu ho entidade hotu iha setór justisa hodi hametin fali konfiansa públiku ba justisa iha Timor-Leste.

 “presija atu dignifika servisu Defensoria Públika ne’ebé sai abut ba setór justisa, no iha país demokrátiku hanesan Timor-Leste presiza tebes apoia hosi defensoria públika nia apoia atu ajuda povu ne’ebé moris iha kondisaun kondisaun sosiál, ekonómiku país ne’ebé minimu banhira sira enfrenta problema justisa”, husu Horta.

Ministru Sergio Hornai durante ne’e hala’o servisu hirak ne’ebe ho susesu kuandu Defensoria Públika no mós Komisáriu Komissão Anti Korrupsaun (KAK).

Iha fatin hanesan, Emposadu, Sergio Hornai agradese ba povu, governu, Xefe Governu, partidu politiku sira hotu ne’ebe asentu iha Parlamentu, partidu Governu ne’ebe indizita nia hodi substitui saudoso Amandio de Sá Benevides.

“Ohin ha’u simu kna’ar ida la’os oportunidade, maibe simu responsabilidade difisil ne’ebe iha dezafiu lubuk ida ne’ebe mak ha’u tenki infrenta para atu hare kona ba konsolidasaun Estadu de diretu demokrátiku ida ne’e iha dezenha politika setór Justisa nian no Governu ida ne’e Depozita konfiansa atu bele hamutuk halo integrasaun ida tantu Rejionál, bilateral, multilateral ou iha ita nia rain rasik iha setór Justisa”, afirma Sergio Hornai, iha Palasiu Prezidensial Bairo-Pite Aitarak Laran, kinta-Feira (15/02).

Governante ne’e mo’s kompromete atu fo kontinuidade ba programa ne’ebe mak sira realiza ona no orsamentu mos  aprovadu ona ne’e.

“ha’u mai integra iha prioridade ida ne’ebe programa sira halo tiha ona no orsamentu mos sira halo ona no ha’u sei hare idak-idak, Diresaun idak-idak, kooperasaun idak-idak, estek holder ne’ebe mak ita halo servisu hamutuk para atu konsolida hamutuk ho ha’u nia Vise-Ministru, Sekretariu Estadu, Diretór jerais Sira no Ajente funsionáriu iha ministériu para atu hare hakat ba oin”, Subliña Hornai.

Ministru Justisa ne’e mos garante sei tau prioridade ba modernizasaun atendimentu pasaporte no mós halo alargamentu ba prizaun Becora, Gleno no Suai kuandu iha posibilidade ba programa no orsamentu.

Reportagem :Eva Ximenes

 734 Tatal Lee,  1 Views Today