Dili-yokalaumedia.com-(23/3/2023). RAES HADOMI TIMOR OAN (RHTO) realiza workshop kona-ba sensibilizasaun defisiénsia ba kargu diretor no xefia CNE no STAE durante iha tempu kampaña no eleisaun

Kampaña eleitoral no eleisaun parlamentar nian besik dadaun ona, nune’e parte relevante sira esforsu makaas atu prosesu sira ne’e lao ho susesu no sidadaun bele partisipa ho di’ak, partikularmente protadór defisiénsia sira.

Prezidente CNE José Agustinho Belo hatete Organizasaun portadór defisiésia mos fo hanoin ba STAE no CNE atu kria kondisaun hodi inklui ema ho Portadór defisiénsia sira nia partisipasaun iha festa demokrasia ne’e.

“dadaun ne’e ami ho STAE hanoin katakpresija iha hanoin ne’ebé hanesan kona-ba cavinha de voto ne’ebé mai presiza mos adekuadu ho sira nia kondisaun tanba sira labele hamriik hanesan ita, entaun ita presiza cavinha de voto  ida bele mos responde ba portadór defisiénsia sira nia nesesidade, eskada ne’ebé naruk ita presiza buka tetu no karik fatin seidauk iha, ita presiza buka hela dalan liu-liu fo prioridade ba sira”, dehan prezidente CNE.

Entretantu, Ângelo Belo, Diretór nasional STAE, apresia ho RHTO ne’ebe organiza ona sorumutu ne’e hodi fo hanoin ba órgaun eleitoral hanesan CNE no STAE atu bele hare’e ho di’ak hodi bele inklui ema ho defisiésia sira nia partisipasaun iha Eleisaun tinan ne’e.

 “primeiru husi parte STAE hakarak hato’o apresisaun bo’ot tebes ba RHTO  ne’ebe durante ne’e halo komunikasaun ho STAE atu bele garante partisipasaun ita nia maluk ho defisiénsia sira iha kualker eleisaun liu-liu eleisaun parlamentar tinan ne’e. Ami, CNE no STAE, sei ezerse ami nia funsaun rasik”, dehan nia.

Diretor Nasionál ne’e mos afirma liu tan katak lojisitikamente, STAE nia preparasaun to’o ona 85%.

Iha tempu hanesan Diretór Ezekutivu RHTO Joaozito dos Santos hateten semináriu ne’e atu sensibiliza Diretor no kargu xefia sira iha komisaun Nasional Eleisaun (CNE-Sigla Portugéz) no STAE hodi asegura partisipasaun ema ho defisiénsia iha eleisaun nee

 “iha esforsu barak ne’eb’e ita atu halo iha sentru votasaun maibe laos hotu-hotu no kona-ba workshop ho objetivu atu bele ajuda STAE no CNE hodi koñese maluk ho defisiénsia sira no tulun sira tuir kondisaun ne’ebe mak iha”, nia hateten.

Loyola da Costa Cruz, portadór defisiénsia, hato’o sira nia deseju atu bele ezerse sira nia direitu ida Eleisaun ho di’ak.

“ami ho difisiénsia sira ne’e tenke vota livre no ho konxiénsia signifika labele iha  ema seluk ne’ebé bele influénsia ami atu tuir sira nia objetivu”, afirma Loyola.

Entretantu relasiona ho workshop refere atu garante no asegura direitu maluk difisiénsia sira nian iha tempu eleisaun, workshop refere realiza iha salaun CNE,Dili,23/03/2023.

Reportájen : Nário Costa no Nito Rangel.

 284 Tatal Lee,  1 Views Today