Díli-yokalaumedia.com (30/03/2023)- Partidu APMT (Asosiasaun Popular Monárquia Timorense) no PDRT (Partidu Demokrátiku Repúblika Timor) estabelese ona koligasaun, iha loron 4 marsu liu ba iha salaun CNE-Díli, atu hamutuk hodi enfrenta eleisaun Parlamentar tinan ne’e, maibe legalmente Tribunal Rekursu la ofisializa, inklui mos PDRT, tanba ne’e mak líder partidu 2 akorda malu, “lia ida”, hamri’ik hamutuk fali APMT nia mahon atu konkretiza mehi polítika sira atu hadia povu nia moris.

Partidu Asosiasaun Popular Monárquia Timorense (APMT) realiza kongresu extraordinariu hodi reajusta estrutura partidu, hatan ba nutifikasaun husi tribunál ne’ebe fo sai iha 25 marsu katak partidu APMT ofisialmente iha legalidade hodi partisipa iha Eleisaun Parlamentar ne’ebe sei hala’o iha 21 maio 2023 tuir dekretu presidensiál.

Liu husi Kongresu extraodináriu ne’e kongresista sira nomeia Agostinho Gomes, Prezidente PDRT, sai fali Prezidente Ezekutivu ba partidu APMT. Agostinho Gomes hateten partidu APMT realiza kongresu ne’e hodi reajustamentu estrutura no programa.

“ami halo re-estruturasaun, haree fila fali ba estatuto no programa ne’ebe uluk, ami konkorda hamutuk, molok hakat ba koligasaun ami aseita malu ona ho nune’e tenki hetan legalidade tenki tuir konferensia”, hateten prezidente ezekutivu ne’e iha Kinta-Feira (30/03).

Nia haktuir liu tan katak oras ne’e sira pronto ona atu compete iha festa demokrasia liu husi mahon APMT nian.

“ami nia preparasaun durante ne’e pronto ona tamba iha baze metin, ami mos fiar-an katak sei liu iha baireira, no ami nia programa prioridade mak hadia dezempregu iha ita nia rain, setor produtivu halai liu ba agrikultura, no Turismu”, hateten Agostinho Gomes.

Sekretário Gerál partidu APMT, Shobari Nunes hateten ohin realiza kongresu ne’e mos hodi harmoniza no lori visaun partidu nian ba oin no atu solusiona nasaun ne’e tenki manan.

“Ami atu harmoniza estatutu partidu APMT nian tamba ami sei simu maun-alin, inan aman husi partidu PDRT nian atu hamutuk ho ami nia ekipa hodi fo forsa ba eleisaun parlamentar iha 21 maio ne’e”, hateten Shobari Nunes.

Partisipa iha kongresu ne’ebe halao iha salaun Haksolok, Vila-Verde kinta-feira ne’e mak militante, estrutura munisipál no estrutura nasionál.

Reportagem : Eva Ximenes

 275 Tatal Lee,  2 Views Today