EKONOMIA AVANSADA NO DIVERSIFIKADA, META NE’EBÉ EMA HOTU MEHI

“esperansa ida ekonomia sustentável (artigo ne’e opiniaun pessoal, la representa instituisaun ne’ebé hakna’ar-an ba)

Husi: Aniceto Soares dos Reis   

Email: jireis118@gmail.com

Kontaktu: +670 77303786

Revizór: Miguel Gonçalves, Docente Integral (#DCS-FCS-UNTL)

PRESPETIVA JERÁL 

Mehi ema-hotu nian mak dezenvolvimentu inkluzivu, hodi bele sente naroman ukun-rasik-an nian. Liuhusi uzu finansiamentu ne’ebé mai husi Orsamentu Jerál Estadu nian, atu rezulta mudansa signifikante, husi aspetu hotu, ho finalidade hadi’a gradualmente kualidade moris sidadaun nian.

Tinan hirak ikus ne’e, Timor-Leste hakur liu realidade difísil ida, instabilidade polítika no ekonómika, maibé ho mundansa konjunturál iha nivel politíka, espetativa ema hotu katak, mudansa ne’e tenke akontese. Nune’e, estabiliza situasaun ne’ebé ema hotu hasoru, husi aspetu makro to’o mikro.

Durante ne’e, ran husi prosesu dezenvolvimentu ne’e, mai husi inisiativa sira ne’ebé mai ho finansiamentu husi Orsamentu Jerál Estadu no nia orijen mak reseita petrolífera no situasaun ne’e ezije duni, atu aposta ba setór vitál seluk, hanesan agrikultura, turizmu, indústria, inklui edukasaun saúde hanesan fatór kontribuiente ba prosesu dezenvolvimentu.

Dezafiu iha kontekstu agora, mak moris di’ak no ezekutivu iha obrigasaun ida, hodi kria kondisaun ba alkansu finalidade moris di’ak nian. Maibé, tarrefa ne’e la’ós mesak, ho kontribuisaun husi setór privadu no entidade seluk, ne’ebé durante ne’e, atua iha introdusaun iha ideia inovativa, empreendedora no brani foti risku hodi halo buat foun ne’ebé di’ak ba Timor-Leste.

Kriasaun empregu, hadi’a prestasaun servisu públiku ba komunidade, asesu ba infraestrutura, hamoris ekonomia iha baze, hanesan nesesidade prinsipál ba luta husi sidadaun nian. Tanba kondisaun hirak ne’e mak sei estimula ekonomia baze no ida-ne’e kontestualiza kedas ho polítika governu nian, kona-ba desentralizasaun administrativa hodi sentraliza servisu balun ba baze no hakbesik servisu públiku nian ba sidadaun, hodi permite envolvimentu ativa no efetiva sidadaun nian iha prosesu dezenvolvimentu nasionál.

RETRATU EKONÓMIKA

Resessu ekonómiku ne’ebé akontese, afeta negativamente ba moris sosiedade nian hanesan rendimentu sidadaun nia menus, kapasidade kompras menus, pobreza aumenta, dezempregu, empreza barak mak taka no situasaun mosu tanba inserteza polítika, pandemia COVID-19, dezastre naturais no konflitu entre Russia no Ukrania no indikadór mak konsta iha Programa Governu nian.

“Ekonomia Timor-Leste nian, husi 2017 to’o 2021, hetan kontrasaun ekonómika média ho valór -1,4%. Iha 2021, PIB naun-petrolíferu hetan valor 1.528 milloens dólares (ne’ebé korresponde ba kreximentu ho valór 2,9%), no PIB Per Capita hetan valór 1.136,00 dólares, (valór ne’ebé tun, iha tinan 5 nia laran, husi 1.285,30 dólares ne’ebé ita hetan iha tinan 2017”

Timor-Leste nia ekonomia seidauk reziliente, vida nasaun tomak nian mós nafatin dependente ba finansiamentu públiku, situasaun hanesan mós enfrenta husi setór privadu no hirak ne’e, dependente ba estabilidade polítika no sirklu Orsamentu Jerál Estadu – OJE ne’ebé Parlamentu Nasionál aprova kada tinan.

Faktu reál kona-ba resesu ekonómika ne’e, bele komprova husi dadus ne’ebé publika husi Servisu Rejistu no Verifikasaun Emprezariál, Institutu Públiku – SERVE.IP husi tinan 2020, 2021 to’o 2022. Iha tinan 2020, empreza 70 mak taka, tanba la iha rendimendu[1],  2021 empreza 70 mak taka,[2] no iha 2022 empreza 21 mak ensera sira-nia atividade.[3] Maske nune’e SERVE.IP rejista liu empreza rihun 38, husi numeru atus ida resin mak rejistadu hanesan empreza internasionál.

Husi sirkunstánsia ne’e, presiza iha alternánsia ida, hodi hamoris hikas atividade ekonómika no medida hanesan apoiu direitu ba komunidade no tipu apoiu seluk ne’ebé ezekutivu avansa. Biar nune’e, medida sira ne’ebé ezekutivu avansa mós la asertivu, hodi mosu kontestasaun oi-oin kona-ba efetividade husi programa sesta bázika, subsídiu ba setór privadu no medida seluk ne’ebé ezekutivu avansa nu’udar alternansia hodi supera kontrasaun ekonómika hanesan sita iha Programa Governu nian, ” Iha tinan 2022, PIB devia sa’e 3.9% no, iha tinan 2023, devia hetan aumentu ho valór 2.9%. Infelizmente, kreximentu ne’e la halo ho sustentabilidade, tanba barak depende de’it ba subsidiasaun ba ekonomia. Governu IX sei kontinua servisu atu aumenta PIB ho sustentabilidade, liuhusi despeza públika iha investimentu estratéjiku.”

Husi instabilidade ekonómika, kualidade moris sidadaun nian sei do’ok husi expetativa hanesan mehi antes ukun-rasik-an katak, valor husi independénsia mak tenke moris di’ak, dezenvolvimentu integradu no inkluzivu ba ema hotu. ”Timor-Leste kontinua mosu hamutuk ho Países Menus Avansadu sira 46 (PMA), ne’ebé identifikadu iha Relatóriu Konferénsia Nasoens Unidas nian kona-ba Komérsiu no Dezenvolvimentu (CNUCD). Ho ekonomia ida ne’ebé dependente tebetebes ba polítika no programa despeza públika nian, falta diversifikasaun ne’ebé konsistente ba ekonomia, ne’ebé bele dudu kresimentu ekonómiku ida ne’ebé lidera husi setór privadu, mak sai nu’udar obstákulu ba dezenvolvimentu sustentável no ba dependénsia menór ba reseita petróleu nian,” [4]

Refleta ba problema estruturante ne’e, Prezidente Repúblika, José Ramos-Horta deklara iha Simeira Least Development Countries iha fulan Marsu tinan 2023, katak Timor-Leste seidauk sai husi lista nasaun dezenvolvidu, maibé admite mós katak, benefísiu hodi kontinua mantein iha Least Development Countries mak benefisia Overseas Development Assistance – OCA,  hodi apoia ekonomia Timor nian sai rezilente iha futuru, “Timor Leste seidauk preparadu atu sai husi lista Nasaun sira kategoria LDC, simu apoiu nebe komunidade internasional fó ita, hodi reforsa ekonomia para ajuda ita diversifika mina no gás, ba ekonomia, turizmu, hodi sai husi Estadu frajíl, Hau rasik konkorda ho Guvernu nia avaliasaun ke ita sei Estadu Frajíl, ohin bele diak maibé aban bele iha dezastre naturais, krize pandemia ka krize ekonomia, hanesan soke bot ida, ita nia ekonomia hakiduk kedas ba kotuk.”

Dezafiu kona-ba estabilidade ekonómika, mak Primeiru-Ministru, Kay Rala Xanana Gusmão deklara nesidade atu aposta ba indústria Kosta Sul, hodi fó efeitu multiplikadór ba ekonomia iha rai-laran, ”Ami foku ba ida-ne’e la’ós de’it osan maibé, sei fó empregu ba Timor, empregu kualidade ba Timoroan sira, efeitu multiplikador direitu no indireitu, ida-ne’e mak importante, mikro pekena emprezas, agikultura, turizmu, buat sira-ne’e hotu, bele haree katak, tema sentrál bo’ot liu iha programa ne’e ko’alia kona-ba ekonomia, para alem de setór saude ho edukasaun.[5]”

DEZEMPEÑU AUTÓR EKONÓMIKU NIAN

Ekonomia husi nasaun ida la’o estável baihira autór ekonómiku hotu, ezerse plenamente sira-nia kna’ar, nu’udar parseiru governu no katalisador ba dezenvolvimentu. Liuhusi implementasaun ba  projetu estratéjiku sira ne’ebé iha efeitu ba interesse públiku nian. Projetu estratéjiku hirak ne’e, la’ós mai de’it husi finansimentu setór públiku, maibé mai mós husi inisiativa empreendedora, sira ne’ebé iha efeitu multiplikadora ba sosiedade nomós sustentabilidade ekonómika.

Sirklu ekonómiku, la’ós de’it envolve parte ida, maibé iha korente ida, ne’ebé nunka kotu, “oferta no demanda – husi produsaun, distribuisaun to’o konsumu” no prosesu ne’e kontinua la’o ho objetivu no prinisipiu resiprosidade katak, parte ne’ebé envolve iha prosesu ida, hot-hotu hetan benefisiu.

Atividade ekonómika sai dinámiku no sustentável, tanba iha autór mos iha potensia ida-ne’e, hahú husi família – konsumidór, mikro pequena empreza, sosiedade husi prespetiva konsumu, produsaun no distribuisaun, empresa, governu ne’ebé mos defini polítika públika sira hodi kontrola atividade ekonómika no apoia produsaun no garante bem-estar sidadaun nian, komersiu internasional ne’ebé envolve atividade esportasaun no importasaun, no instituisaun bankaria ne’ebé atende depozitu no servisu essensial seluk” [6]

Setór Privadu

Bainhira atividade ekonomia hetan difikuldade, hanesan iha tinan hirak ikus ne’e, ne’e bele opta medida sira ne’ebé bele kontribui hamoris ritmu dezenvolvimentu ekonómika, ho opsaun sira hanesan: “A. politica fiscal hodi, aumenta despeza publika no hatuun taxa, hodi ajuda hamoris ekonomia, B. politica monetaria – liu husi aumentu sikulasaun osan iha merkadu, hodi hakbiit kapasidade kompras sidadaun nian, C. apoiu direitu ba sidadaun sira iha forma osan no material, D. komersiu internasional hodi hakbi’it atividade exportasaun no importasaun no e. halo reforma nesesaria hodi aumenta kapasidade produsaun no hamoris ekonomia rai-laran, .[7]

Setór privadu hanesan motór ida mós ba prosesu dezenvolvimentu ekonómiku, tanba ne’e ekonomia nasaun ida, estável, diversifikada no resiliente, bainhira setór privadu, ezerse ninia kna’ar ho di’ak, nu’udar pilar importante ida no atu hakbi’it nesesidade duni medida estratéjiku “Kréditu ba setór privadu, ne’ebé estagna (la la’o) tiha iha tinan 2019 no tun 10% iha tinan 2020, hahú rekupera fali, ho aumentu ho valór 11,6% iha tinan 2021 no ho valór 17,2% iha tinan 2022. Keda (tun) husi kréditu ba setór privadu ne’ebé verifika akontese tanba kontrasaun ekonómika, maibé iha tinan rua ikus ne’e, fila-fali ba kresimentu.”

Durante ne’e, públiku observa katak, empreza barak mak dependente ba projetu sira ne’ebé mak hetan finansiamentu husi OGE no bainhira kuantidade projetu publiku sira menus, empreza barak mak enserra ninia atividade, hodi resulta aumentu dezempregu. “Sei haree ba mecanismo de diversificação financeira, liuhusi Ações para o Investimento do Setor Privado” (Equity Participation), ne’ebé Governo hakarak atu implementa, tanba sei estimula investimentu husi setor privado, sei promove desenvolvimento das infraestruturas, no sei contribui ba diversificação da ekonomia no criação do emprego, hodi bele arrecada ka hatama receitas ba Estado” Diskursu Primeiru Ministru Kay Rala Xanana Gusmão iha Parlamentu Nasional” [8]

Difikuldade ne’ebé empreza barak sente mak kapasidade finanseira, iha ne’ebé, empreza barak lakohi halo imprestimu iha banku hodi sustenta sira-nia atividade, bainhira programa sira ne’ebé mak finansia  ho OGE iha interrupsaun, tanba funan husi instituisaun bankária sira ne’ebé mak fo kréditu ba empresa sira todan teb-tebes.

Ba ida-ne’e, presiza kria kondisaun hotu ne’ebé bele atu hatuur no haburas diversifikasaun ekonómika, liuhusi aposta ba agrikultura, pekuária, peska, floresta no turizmu, aleinde setór indústria nian no tuir komprimissu ezekutivu nian katak, sei loke Banku Dezenvolvimentu ba investimentu ne’ebé bele oferece kreditu ba empresa sira, hodi ajuda kresimentu ekonómku.

Kooperativa

Durante ne’e, iha Sekretaria de Estadu ida ho portefólieu espesífikamente ba setór kooperativa hodi tau-matan, kapasita no empodera sidadaun ne’ebé sai pioneru ba implementasaun setór kooperativa iha Timor-Leste. Assisténsia governu nian nomos funsionamentu kooperativas, bazeia dekretu-lei númeru 16/2004, Lei das Cooperativas, tuir mandatu husi Konstituisaun RDTL artigo 138 kona-ba Organizasaun Ekonómika, … do sector privado e do sector cooperativo e social de propriedade dos meios de produção” no dispozisaun artigo 4 lei das cooperativas, fundamenta katak, setór cooperativas konstitui husi “produção e trabalho, consumo, comércio, agrícola, Crédito, construção e habitação, produção operária, artesanato, pescas, cultura, pescas, ensino e soliedariedade social.”

Kooperativa 191 mak rejistadu iha tinan 2018, maibé barak mak la mak taka, la iha sustentabilidade, maske balun hetan asistensia husi governu,[9] iha 2020 sa’e ba 197, maibé 30 resin mak taka no atu garante katak, kooperativa sira nafatin eziste hodi sai hanesan pilar importante ida husi atividade ekonómika mak medidas ambisioza ne’ebé konsta iha Programa Nuno Governu ne’ebé aprovadu ona, presiza materializa.

“Governu sei kontinua investe iha formasaun de rekursus umanus no kapasidade institusionál, iha nível kooperativas no providénsia ferramentas no ekipamentus, matérias-primas no konsesoens pekuniárias (ka finanseiras) ne’ebé permite hadi’a nia infraestruturas no aumenta kualidade husi nia produtus, ho hanoin halo expansaun de merkadus no aumentu iha atividades de komérsiu,”

Empoderamentu ba grupu kooperativa, liu-liu administrasaun, jestaun  no implementasaun programa estratejiku sira, importante, tanba liga direita ba ekonomia rurál, liu-hosi atividade espesífika ne’ebé organiza husi Grupu Kooperativa dezenvolve no benefisiu direta mak komunidade rurál.

Mikro no pequena empreza

Inisativa barak mak dezenvolve iha baze, liu-liu produsaun no transformasaun produto lokal, sai produtu ne’ebé iha valor ekonómku, bele konserva kleur no atende nesesidade merkadu, barak tebes no balun konsege tama ona iha merkadu internasional.

Produsaun marmelada, krupuk, mina nu’u virjin, sabaun no seluk tan importante tebes atu fo mos apoiu husi parte ezekutivu, tanba difikuldade jestaun, financeira no rekursu difikulta mos empresa ki’ik sira labele dezenvolve-an, balun taka tanba la iha merkadu, konservasaun produto sai problema, tanba ne’e presiza mos asistensia no ajudu husi apektu formasaun, apoiu ekipamentu no finanseiru, hodi garante nafatin sustentabilidade husi implementasaun iniciativa sira no vizaun ne’e konsta mos iha PEDN,“A criação de empregos locais é a melhor forma de elevar os níveis de vida e os meios de subsistência das pessoas que residem em áreas rurais. Iremos promover varias acções, para promover o crescimento do sector privado nas áreas rurais, incluindo o apoio ao crescimento de pequena e microempreza e a introdução de um Quadro Nacional de Planeamento que identifique e apoie oportunidades, no que diz respeito ao desenvolvimento rurál.”

Pioneiru ba mikro no pequena empreza sira normalmente la lori kapital bo’ot, naton de’it, maibé sira brani foti risku, hodi introdús ideia inovativu sira, halo buat úniku, transforma produtu primáriu ba produtu merkadu no hirak ne’e nesesidade duni apoiu. Tipu apoiu ne’ebé mós konsidera ideal mak oferta kréditu ho funan ki’ik ba empresa sira, akompaña mós ho programa formasaun, atu bele dezenvolve na gradualmente nomós projeta ba merkadu, liuhosi apoiu insentivu ba mikro pequena empreza no empreza familiár, hodi kontribui hadi’a ekonomia nasional no projeta ba sustentabilidade.

Empregu ba ema hotu

Husi kedas 2018 hafoin eleisaun antisipada no formasaun governu, assuntu empregu buat ida ne’ebé mak kompleksu tebes, tanba falta konsertasaun polítika no fator esterna seluk ne’ebé, rezulta implika negativamente ba atividade ekonómika nomós kualidade moris sidadaun nian.

Akompaña ho atentu, empresa barak mak taka sira nia atividade tanba la iha rendimentu, despede traballadór, rendimentu sidadaun nian menus, maske ezekutivu avansa medida oi-oin, maibé la konsege trava no situasaun ne’e hetook a’at liu-tan ho situasaun pandemika no mos desastres naturais ne’ebé akontese iha fulan Abril tinan 2021.

“Tuir dadus husi Peskiza Forsa Traballu, iha tinan 2021, 62.9% populasaun timorense iha hela idade ativa (katak, bele servisu), maibé husi populasaun ida ne’e, 30,5% de’it maka integra iha forsa traballu (esklui agrikultura subsisténsia). Husi sira ne’ebé integra iha forsa traballu, la to’o 25% mak hetan empregu formál, ne’e katak kumpre Lei Laborál, no sira seluk iha empregu naun-formál ka nu’udar traballadores independentes (ka servisu ba an rasik)” Programa Nunu Governu Konstitusionál.

Ezersísiu ida ba ezekutivu atual mak ida ne’e, estabiliza ekonomia no hakbi’it mikro no pequena empreza, atu bele hakbi’it ekonomia lokal, hodi hamoris no habarak produsaun no atende demanda lokal nomós nasionál. Inisiativa sira-ne’e konsidénsia mós ho implementasaun polítika desentralizasaun administrativa bazeia ba lei N.º 23 /2021 de 10 de Novembro lei do poder local e da descentralização administrativa, hodi aprosima poder lokál ba sidadaun sira, hodi sira bele partisipa ativamente iha prosesu tomada desizaun no partisipa iha prosesu dezenvolvimentu lokál. “… O desenvolvimento do setor privado da ekonomia em áreas rurais, a criação de novas oportunidades de participação democrática e uma prestação mais efetiva de serviços às populações locais. Com a instituição do Poder Local, o Estado procura favorecer a coesão económica, social e territorial do nosso País através do envolvimento e participação ativa de todos os cidadãos no processo de desenvolvimento local e nacional.”

Kuadu legal ida-ne’e permite atu desentraliza servisu públiku, hodi hamosu oportunidade servisu iha baze, la’ós de’it ba setór públiku, maibé empoderamentu ba setór privadu, hodi hamoris liutan, atividade ekonómika, no sein-duvida katak, finansiamentu ba inisiativa hirak ne’e mai husi projetu petrolíferu ne’ebé sei dezenvolve iha Kosta-Súl.

Bele entende katak, kriasaun empregu ne’e la’ós  de’it konsesaun oportunidade husi instituisaun estatais sira, maibé ida mak desentralizasaun administrativa. “Ba tinan lima mai, ita tenke hahu programa  desentralizasaun administrativa, ne’ebé munisipiu ida-idak tenke prepara-an, hodi buka komprende no koñese munisípiu – Xanana Gusmão iha okaziaun Konferénsia Nasionál Partidu CNRT iha 19 Juñu 2023”[10]

Ema hotu mehi atu programa ne’e konkretiza plenamente desentralizasaun administrativa, tanba konsidera katak, dezenvolvimentu durante tinan 20 resin kuaze servisu públiku, sentraliza iha Díli, hodi rezulta desidade popuplasional nomós problema sosial seluk. Situasuan ne’e insiste ukun-na’in sira, atu halo aranju alternativa ba problema hirak ne’e no konserteza, solusaun mak desentralizasaun.

Ba finalidade ne’e, bainhira ita-buka atu hatene forma oinsa mak konkretiza realizasaun programa ne’e, mak bele entende medida ne’ebé konsta iha Programa IX governu, “Transferénsia atribuisaun, kompeténsia no responsabilidade ba órgaun lokál no munisipál sira, hodi kapasita sira no kria kondisoens atu sira bele fó servisu ne’ebé ho kualidade, nu’udar aspetu fundamentál ida hosi prosesu desentralizasaun.”

Aleinde esplasaun ne’ebé temi iha leten, tuir Estratégia Nacional de Emprego 2017 – 2030, destaka estratégia haat mak hanesan:“1. Promover o emprego gerado pelo sector privado. 2. Aumentar o acesso aos esquemas de migração laboral. 3. Maximizar o impacto das despesas públicas no emprego. 4. Desenvolver as potencialidades locais” no estratéjia ne’e rekoñese importáncia husi setór privadu no dezenvolvimentu rurál, hodi hamoris atividade ekonómika, tanba tarefa kriasaun empregu ne’e koletiva “A criação de um número maior de empregos no setor formal não acontecerá automaticamente. O Governo de Timor-Leste deve adotar políticas, legislação, programas e realizar actividades que possam maximizar o impacto do crescimento económico a nível do emprego, sendo direcionados tanto aos homens como às mulheres. A maximização do emprego exigirá que o Governo, a sociedade civil, os sindicatos e o setor privado trabalhem em conjunto.”

PROJETA BA DEZENVOLVIMENTU SUSTENTÁVEL

Setór aranke ba dezenvolvimentu

Lei inan artigo 138 kona-ba organizasaun ekonómika tane setór privadu hanesan pilar importante ida mós ba dezenvolvimentu ekonómiku no hanesan parseru estratéjiku governu nian, ba implementasaun programa importante sira ne’ebé bele benefisia povu no nasaun, “Organizasaun ekonómiku Timor-Leste nian hatuur iha konjugasaun forma komunitária sira ho liberdade ba inisiativa no jestaun emprezariál no nia koezisténsia ho setór públiku, setor privadu no setór kooperativu no sosiál iha soin meiu produsaun nia.,”

Nasaun ida nia ekonomia sei la’o di’ak, bainhira povu nia bem-estar garantidu ona, halo ajustamentu ba avansu teknolojia, optimalizasaun iha distribuisaun rekursu, hodi povu mós bele sente, sentidu husi ukun-rasik-na ne’e rasik no Wener Sombart defini fator kontribuiente sira ne’ebé sai hanesan pilar ba dezenvolvimentu ekonómiku mak hanesan; “a. Rekursu naturias, hanesan rai, rikeza, mineral, klima, be no mos tasi ne’ebé bainhira optimaliza bele ajuda dezenvolvimentu,  b. rekursu humanu kualifikadu bele apoia dezenvolvimentu ekonómiku, husi forma ogrganizasaun to’o produsaun, c. akumulasuan kapital ne’ebé ligadu ho material no konstrusaun, d. forsa iha nível jestaun iha atividade diária organizasaun sninan no e. mak teknolojia, oinsa mak bele halo adaptasaun ba teknolojia.”

Dezenvolvimentu ekonómiku bele sukat komponente rua: Produtu Nasionál Brutu-Gross National Product – GNP ka rendimentu estadu nian ba tinan ida, katak, rendimentu husi timoroan husi estranjeiru mós konta ona iha GNP, exeptu estranjeiru ne’ebé hela iha Timor-Leste no komponente seluk mak Produtu Doméstiku Brutu – Gross Domestic Product katak, kontajen husi rendimentu estadu ida, husi sidadaun sira-nia rendimentu. Nune’e, dezenvolvimentu ekonómku, la’ós lia mamuk de’it, maibé  tuir  Endang Mulyani (2017) katak, inkrementu ne’e nota husi kuantidade out-put no bele dehan katak, dezenvolvimentu ekonomia la’ós de’it husi out-put, maibé mudansa instituisionál no koñesimentu tékniku – modernizasaun hodi rezulta output barak, nomós bele nota karik, rendimentu nasionál tinan ida, bo’ot liu nivel aumentu populasaun nian.

Hateke ba kotuk, bainhira akontese impasse polítiku, konsertasaun nível polítiku la iha hanesan espriénsia husi tinan 2017 to’o 2019 ka tinan lima nia laran, akontese interrupsaun iha aprovasaun OGE, situasaun ekonómika husi nível makro no mikro sai problemátiku no mosu kontestasaun oi-oin husi komunidade kona-ba nesesidade hamosu ajustamentu polítiku, tanba ekonomia hakdasak no situasaun hetook pior liu-tan ho desastre naturais no situasaun pandemika.

Sein duvida katak, setór petróleo nafatin sai esensiál ba dezenvolvimentu ekonómiku, tanba fonte finansiamentu ba vida nasaun nian durante tinan 20 resin mai husi reseita petrolíferu, hodi haberan dinamizasaun atividade ekonómika no hadi’a gradualmente kualidade moris sidadaun nian.

“Transferénsias husi Fundu Petrolíferu finansia maioria husi despeza públika iha Timor- Leste, no dezde tinan 2009 Governu halo levantamentu anual husi Fundu superiór ba 3% husi Rendimentu Sustentável Estimadu (RSE). Dependénsia ba Fundu Petrolíferu ne’e de’it akontese tanba rekolla reseitas doméstikas sei kiik nafatin (menus husi 12% PIB). Governu IX komprometidu atu kontinua reforma ba jestaun finansas públikas hodi bele diversifika reseitas no rasionaliza despezas, hodi promove sustentabilidade fiskál” Programa Nunu Governu Konstitusionál.

Iha duni nesesidade atu halo diversifikasaun, ho osan ne’ebé mai mai hosi fundu minarai, tanba la uza kautelozamente, Timor-Leste sei sofre défice fiskal tuir previzaun husi ONG La’o Hamutuk,[11] no situasaun ida ne’e ezije duni atu aposta ba investimentu setór seluk ne’ebé bele kontribui reseita-naun petrolífera no ezijénsia ida ne’e mós haforsa ho estudu husi  Presidência do Conselho de Ministros & International Growth Center – IGC.

“A agricultura, as pescas e o turismo são os setores que oferecem mais potencial para um crescimento sustentável e que podem impulsionar a diversificação económica. Em particular, as características naturais do território timorense fazem dele um local ideal para a produção de especiarias de alto valor. Graças às suas águas territoriais ricas, a cadeia de valor das pescas, atualmente muito pequena e improdutiva, poderia desenvolver-se significativamente. Além disso, a riqueza do seu património cultural e natural torna-o um local promissor para o desenvolvimento do ecoturismo” Presidência do Conselho de Ministros & International Growth Center – Igc, Os Motores do Crescimento e da Transformação Sectorial de Timor-Leste.

Iha Planu Estratéjiku Dezenvolvimentu Nasionál destaka pilár ida  katak, setór-alternativa, para além de petróleo, tenke aposta hodi ajuda diversifika ekonomia, apoia mós kompetitividade ekonómika, partikularmente bainhira ko’alia kona-ba adezaun Timor-Leste ba ASEAN, World Trade Organization – WTO no organizasaun rejionál no mundiál seluk ne’ebé rekere atividade exportasaun no importasaun, inklui mobilidade sidadaun nian. “O desenvolvimento da ekonomia de Timor-Leste assentar em torno do crescimento de três indústrias essenciais: agricultura, turismo e petróleo. Timor-Leste possui vantagens consideráveis a nível destas indústrias devido aos nossos recursos naturais, localização geográfica e perfil económico.” PEDN pag. 128.

Durante dékada rua, fonte finansiamentu ba programa governu, mai husi kampu Bayu Undang no ho baze lina mediana – media line, definidu ona, loke possibilidade atu esplora possu petrolifera Greater Sunrise hodi ajuda dezenvolvimentu ekonómku, liuhosi gazodutu mai Timor-Leste, hodi estimula ekonomia nasional, “Dezenvolvimentu Kosta Súl sei sai sentru atividade iha setór petróleu no gás naturál, ho estabelesimentu baze lojístika iha Suai. Hanesan mós refinaria petrolífera ida nomós kompletu petro-kímiku iha Kosta Súl inklui instalasaun fábrika ba gás naturál likifeitu no gás ne’ebé sei mai hosi Greater Sunrise liuhosi konstrusaun gazodutu hosi tasi okos to’o rai-mara. La’ós de’it espltasaun, maibé iha infraestrutura, nune’e servisu ne’ebé sei mosu tan mak sei kria postu traballu direta no indireta liu 50.000,” Xanana Gusmão iha aprezentasaun Programa Governu iha Parlamentu Nasionál. [12]

Setór importante seluk ne’ebé mak sei kontribui ba dinamizasaun atividade ekonómika mak mariña, hodi dezenvolve ekonomia azul, ne’ebé bele kontribui ba prezervasaun, konservasaun no uzu rekursu ba dezenvolvimentu ekonómiku ne’ebé sustentável. Modalidade ne’e, sei ajuda duni tanba ninia sasukat mak tasi nia naruk no luan besik 700 km no potensiál Zona Ekonómika Eskluziva (ZEE) kuaze 75.000 km2, ho biodiversidade iha tasi no iha Programa Governu nian destaka importánsia husi mariña ba Timor-Leste nia futuru.

“Timor-oan barak maka depende ba tasi hodi sustenta moris no meius ba subsisténsia, hodi peska no kaer espésie tasi, hanesan atún (ikan tasi ne’ebé isin barak no furak), kurita no du’ut tasi. Riku ahu-ruin iha meti-ulun no íngremes falésias subaquáticas (rai naruk iha tasi-ibun ne’ebé susar atu liu tanba hali’is makaas loos) ne’ebé hale’u Timor-Leste hanesan atrasaun krexente ida ba turista sira. Tanba ne’e, protesaun no prezervasaun ba ambiente tasi ne’e fundamentál hodi proteje modu moris nian no dezenvolvimentu ekonómiku iha Timor-Leste.”

Ekonomia Moderna no Avansada

Nasaun ida dezenvolvidu, la’ós iha diskursu retorika polítika de’it, maibé hare husi dezempeñu ba realizasun mudança radikais, melloria kualidade moris sidadaun nian, adaptasaun teknolojika, hodi kontribui eficazmente ba ki’ak, subnutrisaun, hamlaha no problema estruturante seluk ne’ebé impede dezenvolvimentu ekonómku.

Tuir Banku Mundial ne’ebé sita no Endang Mulyani, liuhosi livru intuladu Ekonomi Pembangunan (2017), kona-ba agrupamentu husi nasaun dezenvolvimentu hanesan: A. nasaun dezenvolvidu ne’ebé iha rendimento a’as no ekonomia mak sai fokus konsentrasaun, B. nasaun dezenvolvolvidu ne’ebé iha rendimento mediu no setór indústria iha hela faze dezenvolvimentu, C. nasaun terseiru mundu – sub dezenvolvidu ne’ebé mak iha rendimento ki’ik no la iha setór indústria ne’ebé mak bele aposta, D. nasaun exportador mina la tama iha categoria tolu ne’e, maske nasaun ne’ebé mak uza reseita mina-rai ninia dezenvolvimentu la’o lalais liu.

Finalidade ida husi dezenvolvimentu ekonómku mak ba kualidade moris humana nian no mudança notável sira hodi sukat tuir prespektiva Endang Mulyani katak, A. rikeza husi output sociedade ida ka rikeza aumenta, B. fo oportunidade bo’ot hodi optimaliza rekursu ezistente, C. dezenvolvimentu ekonómku sei oerese oportunidade eskolla, D. dezenvolvimentu ekonómku sei resulta mos oferta servisu hodi atende nesesidade humana nian, E. dezenvolvimentu ekonómku sei reduz disparidade entre  nasaun dezenvolvidu ho nasaun sira ne’ebé mak iha prosesu dezenvolvimentu.

Iha Planu Estratejiku Dezenvolvimentu Nasional – PEDN 2011 – 2030, konsidera pilar lima ne’ebé importante tebes ba dezenvolvimentu ekonómiku hanesan, dezenvolvimentu rurál, agrikultura, petróleu, turizmuu no setór privadu ” Timor-Leste construirá uma ekonomia moderna e diversificada com base na agricultura, turismo e indústria petrolífera, com um sector privado emergente e oportunidades para todo o nosso povo.”

Presiza ezersisiu barak, atu Timor-Leste bele to’o iha ekonomia sustentável, tanba la’ós setór mina-rai mak haberan dezenvolvimentu, maibé oinsa utilizasaun rekursu hirak ne’e hodi finansia iniciativa hirak ne’ebé mak bele suporta dezenvolvimentu ekonómku, hadi’a kualidade moris sidadaun nian no problema estruturante seluk ne’ebé iha sociedade.

Programa estratéjiku sira tenke avansa, liu-liu optimalizasaun ba rekursu sira, kria kondisaun ba investimento esterna, hakbi’it mikro pequena empreza, apoia iniciativa empreendora no hadi’ak liu tan prestasaun servisu ba sidadaun, no hamoris liu tan ekonomia, indústria no setór imporante seluk ne’ebé iha valor ekonómku no bele sustenta nasaun nia vida.

KONKLUZAUN

Tranzisaun polítika akontese ho espetativa ida hakarak mudansa, husi aspektu hotu ne’ebé konsideradu importante ba dezenvolvimentu nasaun ida, no hodi hakotu mós problema kompleksu sira ne’ebé nasaun hasoru.

Limitasaun postu servisu, hodi absorve joven dezempregadu sira, rendimentu sidadaun nian menus iha tinan ikus ne’e, empreza sira barak mak taka no problema estruturante seluk, rekere medidas mais konkreta no asertiva, hodi estabiliza ekonomia no projeta mós ba dezenvolvimentu sustentável.

Timor-Leste iha ona Planu Estratéjiku Dezenvolvimentu Nasional – PEDN 2011-2030 ne’ebé mai ho hanoin ambisiozu atu projeta ba ekonomia reziliente ida, maibé situasaun difícil ne’ebé nasaun ultrapassa, difísil atu atinji mehi hirak ne’ebé konsta iha dokumentu ne’e.

Ho mudansa ba ukun ne’e, haforsa ho Planu Ezekutivu nian ba tinan lima mai no dokumentu ne’e sai hanesan mata-dalan, atu intervensaun governu nian, bele rezolve efetiva no efikazmente problema nasaun nian, mak dalan ba edifikasaun ekonómika ida sustentável sei alkansa.

Atu to’o finalidade ne’e, presiza nafatin la’ós medida ezekutivu nian de’it mak tenke rigór, maibé sai hanesan servisu koletivu husi entidade oi-oin, atu kontribui tuir kbi’it no importante mos fasilita no empodera autor ekonómku sira, atu sirklu produsaun no demanda labele kotu, hodi hadi’a no konsolida gradualmente ekonomia nasional.

REFERÉNSIA

[1] Quintão, Paulina (2020), La iha Rendimentu empresa bo’ot 20 taka totalmente,  https://www.thediliweekly.com/tl/notisias/18566-laiha-rendimentu-empreza-bo-ot-20-taka-totalmente

[2] Quintão, Paulina (2021), SERVE rejista empresa 70 mak Taka iha 2021, https://www.thediliweekly.com/tl/notisias/dezenvolvimentu/20101-serve-rejista-empreza-70-taka-iha-tinan-2021

[3] Gusmão Antónia & Chatarina Julia  (2022), Empreza 21 deside taka atividade iha tinan 2022, https://tatoli.tl/2022/06/23/empreza-21-deside-taka-atividade-iha-tinan-2022/

[4] De Sousa Nelson & Belo Rafael Ximenes, (2023), PR Destaka Susessu Ne’ebé Timor-Leste Alkansa iha Doha, https://tatoli.tl/2023/03/07/pr-destaka-susesu-neebe-tl-alkansa-iha-doha/

[5] RTTL, (2023), Debate Programa Ix Governu Konstitusiońal , https://www.youtube.com/watch?v=GR5o9puOMjs

[6] Telkomsel (2023), Pelaku Ekonomi: Pengertinan, Peranan dan Contohnya, https://www.telkomsel.com/en/jelajah/jelajah-lifestyle/pelaku-ekonomi-pengertian-peranan-dan-contohnya

[7] Ismail, M. Ayub (2023) Resesi adalah ancaman?, https://stekom.ac.id/artikel/resesi-adalah-ancaman

[8]RTTL, (2023), Rttl,Ep – Debate Programa Ix Governu Konstitusiońal (I) || 18-07-2023 (Live Stream) https://www.youtube.com/watch?v=1XybHwV5v5o

[9] Auxiladora, Maria & Pinto, Manuel (2018), https://tatoli.tl/2018/05/28/kooperativa-iha-tl-hamutuk-191-maibe-balun-la-lao/

[10] Gusmão, Antónia & Chatarina Julia, Poder Lokal no Desentralizasaun Administrativa sai Prioridade ba IX Governu, https://tatoli.tl/2023/06/19/poder-lokal-no-desentralizasaun-administrativa-sai-prioridade-ix-governu/

[11] Cárceres, Rogério Pereira (2023), Fundu Mina-Rai hela de’it ona Billaun 16, hatutan.com/2022/12/14/fundu-mina-rai-hela-deit-ona-billaun-16-resin/

[12] Gusmão Antónia & Catarina, Júlia (2023), Kosta Súl Sei Sai Sentru Atividade iha Petróleu no Gáz Naturál, https://tatoli.tl/2023/07/18/kosta-sul-sei-sai-sentru-atividade-iha-setor-petroleu-no-gas-natural/

 2,328 Tatal Lee,  1 Views Today