Díli, yokalaumedia.com (20/06/2023)- Partidu Congresso Nasional Reconstrução Timorense (CNRT) realiza konferensia Nasionál ida iha loron 19 juñu ne’e hodi deside hamutuk atu koliga ho partidu Demokratiku (PD) ba formasaun IX Governu.

Bazeia ba estatutu partidu CNRT artigu 27. 2: konferensia Nasionál maka hanesan orgaun Máximu iha Intervál kongresu nasionál atu diside kona ba asuntu ida ne’e, enkuantu iha artigu 27. 3: konferénsia nasionál mak iha kompeténsia inkluziva no bo’ot liu atu deside hamutuk para priense lei eleitorál molok atu koliga iha parlamentu Nasionál no hafoin ne’e mak bele hamosu Governu ou IX governu.

Konferénsia ida ne’e mos realiza bazeia ba artigu 19, Nú. 3 Lei Nú.3 2004 ne’ebe atualiza lei Nú.2/2016, 3 de fevereiru kona ba partidu politiku sira katak konferénsia nasionál mak iha kompeténsia eskluziva atu diside kona ba koligasaun partidu ho partidu sira seluk.

Sekretáriu Jerál CNRT, Franscisco Kalbuadi Lay, hateten tuir lei eleitoral katak partidu ida ne’ebe la manan ho maioria absoluta, tenki koliga ho partidu seluk hodi forma governu no iha Alinea 1 artigu 106 Konstituisaun RDTL, katak primeiro-Ministro indigita husi partidu mais votadu.

“Tuir lei eleitoral katak ita la manan maioria mak dalan seluk tenki halo koligasaun ho nune’e Iha loron 30 maio ami (CNRT) simu karta ofisiál ida husi partidu PD hodi halo koligasaun, ho nune’e ami mos fo hatene kedas ba prezidente partidu ho CPN hodi realiza reniaun ida no ami mos hatan iha loron 5 juñu, hodi forma nuno Governu”, hateten sekretáriu Jerál Partidu CNRT, Kalbuadi Lay, iha konferénsia Imprensa, Segunda-Feira, 19/06, iha salaun OKA.

Iha momentu hanesan, prezidente partidu CNRT, Kay Rala Xanana Gusmão, husu ba Autoriedade munisipiu sira atu  prepara-an ho di’ak liu tan hodi lori dezenvolvimentu ba povu iha baze tanba ohin hahu ona deside koligasaun ho partidu PD hodi forma governu.

“Agora ba oin ita nia lema ou moto la’os ona “fiar-an la’o ba oin”, maibe prepara-an atu sai munisipiu, tamba ukun-an ne’e dezenvolvimentu la’os mai husi leten mak tun ba kraik, hotu-hotu tenki sente dezenvolvimentu to’o iha kraik liu, benefisiu ukun-an ida ne’e mak dezenvolve povu”, husu Xanana Gusmão, iha konferensia Nasionál.

Líder nasionál ne’e mos kontinua husu ba militante no kuadru partidu nian ne’ebe sei okupa kargu atu servi povu no servi nasaun ho prinsipiu ida katak lori dezenvolvimentu besik ba povu iha baze atu sira mos bele sente benefisiu husi ukun-an ida ne’e.

Reportajem : Eva Ximenes

 2,192 Tatal Lee,  1 Views Today