Díli, yokalaumedia.com (29/07/2023) – Sekretária Estadu ba Iguáldade no Inkluzaun (SEII) hanesan instituisaun Estadu ne’ebé ho responsabiliza no tau matan ba asuntu feto, labarik-feto no komponente vulnerável seluk iha Timor-Leste no liuliu halakon deziguáldade jéneru iha aspetu hotu-hotu.

Programa IX Governu Konstitusionál nian hetan ona apravasaun ho unanimidade iha Parlamentu Nasional iha loron 19 fulan Jullu tinan 2023, hafoin ne’e Sekretária Estadu ba Iguáldade (SEII) identifika no prepara kedas atividade prioridade hirak-ne’ebé tutela mai iha SEII atu alkansa iha loron 120 ba asuntu promosaun iguáldade iha Timor-Leste.

SEII iha atividade importante 14 ne’ebé sei halo loron 120 atu nune’e bele alkansa objetivu IX Governu konstitusionál:

Ida– Sosializasaun no Sensiblizasaun kona-ba Rekomendasaun Observasaun finál CEDAW tinan 2023 nian hosi Komité CEDAW. Timor-Leste ratifika ona Konvensaun CEDAW iha fulan Abríl tinan 2003. Tuir artigu 18 Konvensaun Refere katak Nasaun Estadu Membru sira sei hato’o relatóriu inisiál tinan ida hafoin ratifikasaun. Estadu Membru iha obrigasaun hato’o relatóriu Periódiku kada tinan haat ba Komitê CEDAW, nune’e mak iha tinan 2021 Estadu Timor-Leste liuhosi SEII submete ona relatóriu periódiku dahaat nian no hato’o aprezentasaun iha Jenebra ba Komité CEDAW iha loron 9 fulan Maiu tinan 2023.

“iha tinan 2021, Estadu Timor-Leste liu hosi SEII submete ona relatóriu periódiku dahaat nian no halo ona aprezentasaun iha Jenebra-Suíza ba Komité CEDAW iha loron 9 Maiu 2023. Komité CEDAW fó fila fali Observasaun Konkluzaun ida ne’ebé kompostu hosi apresiasaun ba progresu ne’ebé Timor-Leste alkansa ona no mós rekomendasaun hirak ne’ebé  Estadu Timor-Leste sei presiza implementa iha tinan haat tuirmai tanba ne’e importante atu halo sosializasaun rekomendasaun hirak-ne’e iha Konsellu Ministrus, Parlamentu Nasionál, Liña Ministeriál no instituisaun relevante seluk”, dehan Sekretária Estadu ba Iguáldade, Sra. Elvina Sousa Carvalho.

Rua– Vizita Assosiasaun Feto iha Munisípiu sira hodi realiza sorumutu ho Assosiasaun Feto sira ne’ebé mak establese ona hodi promove iguáldade jéneru iha área hotu-hotu iha nível munisipál no atu introdús no haree besik atividade sira ne’ebé mak Assosiasaun hala’o ona no reve fila fali saida mak la’o ho di’ak atu kontinua hala’o ba oin no saida  mak sei presiza hadi’ak diak liután.

Tolu– Sosializasaun ba Planu Asaun Nasional kontra Violénsia Bazeia Jéneru tinan 2022-2032. Planu Asaun Nasionál Violénsia Bazeia ba Jéneru aprova ona liuhusi Rezolusaun Governu Nú. 31/2022, 3 Novembru 2022 ho duransaun tinan sanulu (2022-2032) atu kontinua halo prevensaun no kombate violénsia bazeia jéneru iha Timor-Leste. Sekretária Estadu ba Iguáldade sei kontinua halo sosializasaun PAN-VBJ ba iha liña ministeriál responsável sira, Parlamentu Nasionál, Autoridade lokál, Profesores no studante sira. Sei organiza mós sesaun sosializasaun no hasa’e kuñesimentu ba média no komunidade sira hotu atu hatene sira nia papél saida mak sira mós bele halo hodi kontribui ba prevene no kombate violénsia bazeia jéneru.

Haat– Instituisaun ne’ebe lidera husi ex Deputada PD, Elvina Sousa Carvalho, mo hakaral revé no Adota Deklarasaun Maubisse Datoluk. Deklarasaun Maubisse Daruak asina iha tinan 2018 iha tempu VI Governu Konstitusionál nian ho instituisaun implementadora hamutuk sanulu resin neen (16). Iha tinan 2023 Deklarasaun Maubisse sei kaduka iha Outubru tinan 2023 mai agora. Nune’e mak SEI sei mobiliza rekursu atu halo revizaun ba Deklarasaun Maubisse nune’e bele adota fali deklarasaun Maubisse Datoluk iha selebrasaun Loron internasionál Feto Rurál iha loron 15 fulan Outubru tinan 2023.

Lima– Hakbiit Partisipasaun Feto iha Polítika “Feto Prontu Lidera” iha Eleisaun Suku tinan 2023. Iha fulan Setembru tinan 2023 Timor-Leste sei hala’o fali eleisaun ba Lideransa Komunitária sira. Papél importante hosi SEI ninian mak kontinua fó kapasitasaun ba lideransa feto iha nível suku nian ne’ebé mak iha potensialdade ba sai hanesan lideransa komunitária atu partisipa no kompete ba Xefe-Suku no Xefi-Aldeia. SEI mós sei organiza Interkámbiu ka Estudu Komparativu husi Xefe-Suku Feto susesu sira ba iha Suku seluk ne’ebé seidauk susesu.

Neen– Enkontru ho Parseiru Dezenvolvimentu sira. SEI mós sei kontinua konsolida no haforsa parseria ho parseiru internasionál no nasionál sira atu iha koordenasaun no kolaborasaun ne’ebé di’ak hodi hamutuk halo advokasia ba implementasaun kompromisu iguáldade jéneru sira hanesan Observasaun Konkluzaun hosi Komité CEDAW tinan 2023 nian.

Hitu– Revizaun Planu Estratéjiku tinan 2023 – 2028. Kada Governu iha ninia programa no estratéjia oinsa atu alkansa programa no atividade sira atu promove iguáldade jéneru, elimina diskriminasaun hasoru feto, prevene no kombate violénsia bazeia jéneru, hakbiit ekonomia feto no promove partisipasaun feto iha vida polítika no pozisaun foti-desizaun. Iha loron 120 nia laran SEI sei halo revizaun ba Planu Estratéjiku tinan 2018-2023 hodi elabora fali Planu Estratéjiku foun ba tinan 2023 – 2028 nian. Planu Estratéjia ida-ne’e sei aprova iha Fulan Outubru tinan 2023.

Walu– Instituisaun ne’ebe lidera husi feto poténsiál husi PD, Elvina Sousa Carvalho, Kontinuasaun Konsultasaun ba Revizaun Lei Kontra Violénsia Doméstika. Lei Nú. 7/2010 kona-ba Lei Kontra Violensia Domestika (LKVD), existe ona durante tinan 13. Durante dekade ida liu númeru violénsia hasoru feto no labarik-feto ne’ebé rejistu kada tinan ho númeru ne’ebé aas. Maibé hafoin implementa iha tinan sanulu resin ita descobre lakunas balun iha lei ne’e. Ne’e duni presiza halo revizaun atu akumula ho klaru liután kona-ba definisaun husi Violénsia Doméstika no kazu insestu hodi halo mós ajustamentu ho Kódigu Penál Timor-Leste nian.  Prosesu halo advokasia ba revizaun ne’e hahú tiha ona iha tempu Governu anteriór nune’e SEII sei kontinua servisu ida-ne’e liuhosi konvoka enkontru ho Grupu Traballu ne’ebé establese ona hodi kontinua servisu hamutuk atu bele atinje nia rezultadu.

Sia– Finaliza PAA SEII tinan 2024. Diresaun Planeamentu no Orsamentu SEII nian sei kontinua lidera prosesu preparasaun Planu Asaun Anual SEII nian ba tinan 2024, hamutuk ho Diresaun hotu-hotu iha SEII.

Sanulu– SEII sei hala’o mós konsultasaun no diskusaun, durante IX governu, atu haree fila fali mekanizmu fó apoiu Fundu Tranferénsia Públiku ba organizasaun feto no grupu vulnerável sira iha terrítoriu Timor-Leste laran tomak. Atu nune’e bele halo ajustamentu ba Matadalan ne’ebé mak eziste ona no oinsá atu bele fó apoiu di’ak liu ba grupu feto sira hodi hakbiit sira nia ekonomia diak liu.

Sanulu-resin-ida, SEII mos iha papel ida atu Selebra loron eventuál sira, hanesan Loron Internasional Feto Rurál (15 Outubru); Loron Nasionál Feto (3 Novembru); no Kampaña Loron 16 Ativizmu Kontra Violénsia Hasoru Feto no Labarik-Feto (25 Novembru – 10 Dezembru) hodi kontinua halo sosializasaun no advokasia ba prevensaun violénsia bazeia ba jéneru iha Timor-Leste

Sanulu-resin-rua, Iha loron 120 nia laran mós SEII sei halo revizaun ba Lei Orgánika SEI nian hodi ajusta ho organograma no programa IX Governu Konstitusionál nian no iha posibilidade aumenta departamentu iha diresaun sira.

Sanulu-resin-tolu, Revizaun ba Lei Traballu Doméstika tanba ne’e sei halo koordenasaun ho Grupo Mulher Parlamentar Timor-Leste (GMPTL) no SEFOPE atu haree fali esbosu ba Rejime Traballu Doméstika ne’ebé iha ona hodi halo aprovasaun.

Sanulu-resin-haat, Enkontru Grupu Traballu Jéneru (GTJ) Nível Interministeriál no Munisipál iha fulan Outubru bazeia ba Rezolusaun Governu nú. 35/2017 ne’ebé fó kompeténsia no responsabilidade ba SEI atu organiza enkontru regulár entre Sekretária Estadu ba Iguáldade ho GTJ liña ministériu no munisípiu sira.

Planu programa ne’e yokalaumedia.com asesu liu husi komunikadu imprensa ne’ebe publika iha Díli, Loron 28 Fulan Jullu Tinan 2023.

Reportagem : Eva Ximenes

 3,109 Tatal Lee,  1 Views Today