Mariano Asanami simu diplomata Australianu hodi define área kooperasaun

Díli, yokalaumedia.com (10/08/2023)- Vice-Primeiro Ministro, Ministro Coordenador dos Assuntos Social e Ministro de Desenvolvimento Rural e Habitação Comunitária, Mariano Assanami Sabino, simu vizita kortejia husi Embaixadór Austrália iha Timor-Leste, Caitlin Wilson, iha Palasiu Governu.

Iha sorumutu nee, diplomata Australianu Caitlin Wilson, felisita Vise-Primeiru Ministru neebé hetan fiar husi estadu hodi halao servisu ezekutivu nian no hateten sei hametin liu tan kooperasaun bilateral entre rai rua iha futuru.

“Austrália ho Timor-Leste hanesan belun di’ak no hanesan Parseiru Dezenvolvimentu ne’ebé boot liu, entaun ba futuru saida mak presiza atu halo tan ba oin, tanba nee presiza rona governu hodi hatene sá programa prioridade mak atu implementa iha futuru, atu nunee parte rua bele servisu hamutuk ba oin”, afirma Caitlin Wilson.

Iha fatin hanesan, Vice-Primeiro Ministro, Ministro Coordenador dos Assusntos Socil, MDRHC, Eng. Mariano Assanami Sabino, agradese ba Embaixadór Austrália iha Timor-Leste, neebé kontinua hatudu ninia komitmentu hodi rona governu saida mak sira bele apoiu iha futuru.

“durante ne’e ami halo servisu makas oituan halo enkontru ho embaixadór hotu-hotu atu konsolida programa no orsamentu ne’ebé sira apoiu, atu nunee bele sinkroniza programa sira no halo koordenasaun servisu ne’ebé di’ak liu”, dehan, iha Palasiu Governu.

Líder foin sa’e ne’e mos relembra fali katak durante nee Austrália apoiu ona programa Dezenvolvimentu Rural, liu husi atividade PNDS nian, tanba nee ba oin presiza integra programa sira iha baze, hodi halo monitorizasaun no avaliasaun hamutuk ba programa sira neebé implementa ona atu nunee servisu sira bele la’o di’ak hodi fo benefisiu ba povu iha área remota.

Reportagem : Mário da Cruz (Kontributór) & Eva Ximenes (Revizora)

 625 Tatal Lee,  1 Views Today