Baucau, yokalaumedia.com (20/08/2023) – Ministru Asuntu Kombatente Libertasaun Nasional (MACLN-Sigla Portugez), Gil da Costa Monteiro partisipa serimonia komemorasaun loron Forsa Armada Libertasaun Nasional Timor-Leste (FALINTIL), ba dala 48 iha Munisipiu Baucau, hodi fahe mos sertifikadu rekoñesimentu ordem Komandante Xefe FALINTIL, Kayrala Xanana Gusmao  ba membru Dewan Solidaritas Mahasiswa Putra Putri Timor Timur (DSMPPTT).

Tuir Governante ne’e katak sertifikadu ne’e hodi rekoñese membru DSMPPTT ne’ebe mak durante tempu okupasaun Indonezia, fo mos sira nia kontribuisaun ba luta independensia Timor-Leste nian.

“Oan Soru” mos esplika katak membru DSMPPTT ne’ebe mak simu sertifikadu ba rekoenesementu Ordem Xefe FALINTIL, Kayrala Xanana Gusmao hamutuk ema nain 231. Sira mai husi Postu Administrativu Baucau Vila, Baguia, Laga, Queliqai, Vemasse no Venilale.

“Hau agradese ba inan ho aman, juventude feto no mane, Ferik no katuas graca a Deus ho entidades hotu-hotu nia barani hamutuk ho DSMPPTT konsege bele salva girileiru sira lubuk bo’ot ida inklui ho komandante L7 ne’ebe mak luta ba ukun rasik-an durante tinan 24 nia laran, ida ne’e laos servisu ne’ebe fasil ne’ebe husu ba entidades hotu atu halo reflesaun, reativa entidades hotu-hotu nia prezente no mai ita hotu projeta ita nia futuru Timor-Leste ne’ebe diak liu ba nasaun no nia povu”, hateten Gil da Costa Monteiro, iha nia diskursu, iha Baucau, Domingo (20/08).

Tuir komunikadu imprensa ne’ebe publika husi media-MACLN, ne’ebe yokalaumedia.com asesu katak partisipante iha serimonia komemorasaun ba loron Nasional FALINTIL ba dala 48 ne’e husi membru governu, membru Parlamentu, Veteranus, PNTL munisipal, F-FDTL munisipal, membru CCLN, Funsionariu Administrasaun Munisipal,Uniaun Eskuteriu Timor, Bombeirus, Reprezentante OPJELATIL munisipal, komunidades no konvidadus.

Reportagem: *

 949 Tatal Lee,  2 Views Today