Díli, yokalaumedia.com (14/09/2023) – Primeiru-Ministru Kay Rala Xanana Gusmão no Prezidente Repúblika, José Ramos-Horta hala’o enkontru semenál hodi deskute programa Estadu Timor-Leste nian ne’ebé sei aprezenta iha reniaun Asembleia Jerál Organizasaun Nasoes Unidas (AJ-ONU) iha Nova Iorke.

Xefe Estadu, José Ramos-Horta loron, sesta 15 Setembro sei hala’o vizita servisu ba Estadus Unidos America (EUA) hodi partisipa no hato’o mensajen iha AJ-ONU, nune’e lideransa rua tau hanoin hodi aprezenta programa governu no estadu Timor-Leste nian ne’ebé hala’o hela.

“Ha’u mai informa ba prezidente saida maka governu halo no prezidente mós fó hanoin, aban prezidente sei ba Nova Iorke hodi tau hanoin ruma para prezidente ba sei hato’o iha ne’eba”, dehan PM Xanana ba jornalista iha Palasiu Prezidensiál, Dili.

Xefe governu Xanana aprezenta mós desizaun governu nian liu hosi Konsellu -Ministru hodi aprova proposta lei-organiza liña ministeriu sira nian ne’ebé haruka ba Prezidente Repúblika hodi haree no dekreta hodi fó dalan ba governu hala’o servisu tuir lei.

PM Xanana informa mós jornada Orsamentu Jerál Estadu (OJE) 2024 ho  tema “Kontinua Konsolida no Transforma Prestasaun Servisu liu hosi Hadia Sistema Jestaun no Estratéjiku Investimentu” ne’ebé muda sistema balun hodi kumpre lei orsamentu nian.

Iha oportunidade ne’e, PM Xanana atualiza mós ba PR Horta kona-ba viazen servisu ba Xina hodi partisipa iha ASIAN Games 2023 ba dala-19 iha Hangzhou Xina hamutuk ho atleta Timoroan 58 ne’ebe kompostu hosi feto 24 fahe ba atleta feto na’in ualu (8), Ofisiál feto na’in-16 no mane na’in-34 ne’ebé mai hosi federasaun 10 hanesan, Tenis do Campo, Atletismu, Taekwondo,Karate-do,Natasaun, Federasaun Tiru, Boxe, Federasaun Halterofelismo, Badminton no Vollybool Praia.

Reportagem : Eva Ximenes

 2,815 Tatal Lee,  1 Views Today